Nwel in ariv ankor e nou vwar bokou transformasyon otour nou. Lavil in dekore, sanson lo radio ek televizyon in sanze, nou lakour in vin pli zoli e nou pe mazin en kado pour bann ki pre ek nou. Me byensir refleksyon ki nou bezwen fer se ki kalite transformasyon nou leker pe pas ladan.  

Nwel I en moman pour kretyen selebre en lafet relizye kot nou dir mersi pour Zezi, nou Sover. In vin dan lemon pour donn nou son lanmour, son lape e pour sov nou dan pese ek sa ki mal. Alors letan nou pe rod sa transformasyon, I osi enportan ki tou I komans avek remersiman pour Bondye Toupwisan, ki mazin nou son zanfan, e akonpanny nou tou lezour dan nou lavi.  

Malgre tou bann defi ek latristes ki nou pas ladan, e mon napa okenn dout ki bokou dimoun pe pas dan latristes pour diferan rezon, annou gard nou lafwa dan Bondye vivan pour atrap son lanmen e les li gid nou dan tou fernwanr, akoz apre tou se li lalimyer, e fernwanr lemon pann zanmen kapab detri sa lalimyer.  

Selebre Bondye dan nou lavi. Son lenkarnasyon I dan nou leker, e alor annou sorti Bethlehem e les Bondye pran control nou lavi e diriz nou dan bon direksyon.

  Sa I prensip tou lafwa atraver lemonn. Annou koman en pep les nou ganny gide par Bondye pour ki letan nou vwar tou sa lalimyer otour nou, nou ava pran lavi pli serye e aksepte lalimyer koman sa nouvo fason viv an kominote. Me osi pou partaz nou lalimyer avek lezot afen ki nou tou, nou avar solider e mars vreman pre ansanm koman en nasyon dedye pou les dibyen ranport laviktwar lo lemal, lalimyer anvair fernwanr e pozitivite konkerir negativite.

Pour sa Nwel, mon annan bann soue spesyal pour tou ki dan soufrans, difikilte, dey, maladi, douler, separasyon ek lezot Sitiasyon . Mon swet zot kouraz ek lafors, me par lao tou, benediksyon ek lalimyer Bondye dan zot leker. Bondye toupisan I nou kreater, atraver Zezi kretyen I kwar ki bondye in montre nou son semen. Les li kontyen gid nou ver en semen meyer, pour nou reste en pep vreman for e obeisan anver son lavolonte.

Mon swet zot tou en zwaye Noel 2024.

Have a blessed Christmas,

Joyeux Noël.