Ser ek frer Seselwa,
Ozordi mon anvi fer en pti bilan avek zot lo serten size nasyonnal e an menm tan partaz serten panse e refleksyon lo nou pei e direksyon ki I pe ale. Mon napa okenn dout, ki nou pep ozordi I enn ki analiz son sitiasyon e les li ganny dirize avek sa ki vre e byen. Mon rankontre en tel matirite kan mon koz avek dimoun e ganny loportinite rankontre zot, swa dan bann rankont, kot zot lakour, dan biro oubyen kot en fineray ou kek lezot lokazyon. Parey zot konnen, pli gran lazwa pour mwan se zisteman pou ekout sa ki dimoun I annan pou partaze e eksprimen.
I annan bokou defi ki nou pe fer fas avek koman en pep. Me mon bezwen eksprim mon lankourazman kan mon kontinyen war en pep rezilyan e determinen pou reisir a tou moman. Seselwa ozordi in pran sa bon latitid ki a tou moman nou bezwen rod solisyon. Se sa lespri ki fer nou sirmont tou sitiasyon ki anvi zet nou ater. Zot kapab kont lo mon ladministrasyon pou akonpanny zot lo sa larout a tou moman. Aksyon e pran desizyon, I de eleman ki diriz travay ki pe ganny akonplir Sesel ozordi. Byensir, pa tou desizyon ki pou dan satisfaksyon tou dimoun. Mon rekonnet sa, me se pa sa ki pou diviz nou koman en pep. Okontrer, a tou moman nou devret rod konpran pwennvi sa lot dimoun kan I pa parey avek sa ki pour nou. Se sa ki anmenn respe e permet nou reflesir lo en lot nivo ki bon pour nou tou, e partikilyerman pour nou zoli pei.
Napa en moman dan nou listwar kot plis madam in pran pli gran responsabilite enportan dan nou pei. Plizyer zenn madanm I ozordi a-latet zot lorganizasyon e pe zwe en rol tre enportan. Mon profite pou felisit zot e rekonnet zot profesyonalism dan zot lapros e zot dezir profon pou fer zot lorganizason ek nou pei bouz pli devan. Kontinyen sa bon travay, e touzour mazinnen ki plis ki ou travay byen e drwat, ou riske ganny kritike. Me pa les zot deroute. Sa I osi aplike pour tou profesyonnel dan nou pei. Kontir zot bon travay ki donn zot satisfaksyon personel e nouri zot konsyans.
Dan sa lespri mon anvi anons avek zot serten devlopman ki pou arive dan diferan lorganizason.
Premyerman, avan lafen Zilyet, ASP Janet George pou ganny apwente koman nouvo Komisyonner Prizon pou ranplas Mr St. Ange kin deservi dan sa pozisyon. I pou vin premye madanm Seselwa pou okip en tel pozisyon dan Sesel. Avek son leksperyans dan lapolis, nou napa okenn dout, ki avek sipor neseser, Komisyonner George I avar akonpli son responsabilite avek ladwatir e ede transform nou servis prizon koman en lenstitisyon reabilitasyon. Nou swet li tou sikse.
L'Union Estate, La Digue, li osi pe pas dan en transformasyon. Apre bokou lannen defi, laferm L’Union in ankor enn fwa trouv son plas lo sa zil koman pli gran laferm ki pe prodwi diferan fri, legim, dizef ek lavyann. Sa transformasyon I remarkab e nou anvi war ki avek plis devlopman lo zot plan, L’Union I ava vin en propriete ki donn nou viziter valer pour zot larzan, me osi kontribye dan lavi bann Digwaz e dan lekonomi Sesel.
Bord in fer son deliberasyon e nouvo CEO se Mr. Loncey Micock. Mr. Micock pou an menmtan kontinyen desarz son responsabilite koman zofisye liyezon, en rol ki in fer vreman byen. En nouvo bord L’Union anba direksyon Mr. Nigel Rosette ek en group melanze in osi ganny apwente, e mon bezwen dir ki zot pe travay vreman dir pou war L’Union Estate vin sa landrwa ki nou anvi.
Semenn prosen, mon pou nonm nouvo Bord IDC. Sa I pou osi form parti sa preparasyon pour lapwentman en nouvo CEO pour IDC avan lafen sa lannen. Apre en long servis, Mr. Glenny Savy pe pran son retret. Mon swet li bonn sans dan son bann lezot plan a-lavenir.
State House pou byento ganny en Sekreter Prensipal. Sa lapwenteman pou ganny fer dan mwan Out. Ofir e amezir ki I annan lezot lapwentman, piblik I avar ganny enformen.
De size ki konsern nou pep I TRNUC ek Dezas le 7 Desanm, spesyalman leksplozyon CCCL. Mon kontan pou anonse ki lo tou lede, bokou progre in ganny fer e ozordi nou pe ariv en pwen kot mon kapab deklare ki tou keksoz I anba kontrol.
An sa ki konsern TRNUC, bokou refleksyon in al dan sa rapor ki ti ganny prezante an Mars 2023. Mon felisit ankor sa Komisyon pour sa bon travay ki zot in fer. Me malerezman, anmezir ki zot in rod sa laverite e ekspoz li avek nou pep, noun soke pou war sa kantite atrosite kin ganny komet anba Prezidans Mr Albert René lo nou bann sitwayen. Serten in ganny anprizonnen san lord lakour, lezot in disparet, ganny tortire, touye e disparet, ganny arase zot later ek zot biznes, ganny vyole e ganny anvoye an ekzil. Tou sa bann rikord in ganny anrezistre e dokimante. Aprezan I reste dernyen parti sa travay pou ganny fer. Me mon anvi reasir tou Seselwa ki sa bann atrosite pa pou zanmen arive ankor dan nou pei e okenn dimoun ki aspire pou retourn dan sa pase nwanr pa pou zanmen reisi.
Monn konsilte e apre refleksyon, mon pe nonm sa 3 dimoun swivan pou termin sa travay: Msye Michael Green, ansyen Komisyonner, Madanm Nicole Gerardhi-Tirant, ansyen Ombudsman e Depite Chair Human Rights Commission e Msye George Bibi, ansyen politisyen e en profesyonnel koman manm sa Komite ki pou konplet tou travay ki reste parey rapor ti rekomande. Zot pou bezwen osi fer en rekomandasyon final lo sa size konpansasyon pour bann viktim. Sa I en gro size kontroversyel ki mon konnen viktim ek lepep Seselwa pe swiv tre pre. Mon swet sa bann dimoun bonn sans dan zot deliberasyon.
Lo kote CCCL, mon kapab dir avek zot ki tou bann ka rezidan Cascade kin vin alatansyon lotorite konsernen in fini ganny pran anmen e tou rezidan pe resevwar lasistans neseser. Personn pann ganny kit deryer malgre sa bann move propagann politik. Plis ki R30m in ganny depanse ziska prezan.
Lezot size ki pe ganny finalize I konm swivan.
Ser ek frer Seselwa, ozordi nou pe viv dan en pei kot stabilite ek progre I mark sak zour nou lekzistans. Nou ladministrasyon pe kontinyen travay pour lepanouisman ek devlopman sak Seselwa. Se sa ki fer nou diferan: Nou travay pou devlop nou lekonomi e tou sikse ki nou fer, nou remet li avek sa pep, limenm kin kree sa larises. Nou reste konekte avek nou nasyon pou asire ki vre devlopman I arive pou fer lavi sak Seselwa vin pli konfortab o-milye en monn ranpli avek defi.
Minister Gouvernman Lokal in prezant son rapor kin montre ki pandan 2023, zot in akonpli plis ki 200 proze kominoter. Sa I bann proze ki ed sitwayen direkteman e soulaz zot. Partou kot nou pase, nou war sa bann pti proze pe materyalize – en semen, en drenaz, en peron, koup pye dibwa danzere ek lezot I kapab bann pti keksoz, me I enportan akoz I kapab anmenn sanzman dan lavi en fanmiy ek en pti kominote.
Bokou lanfaz pe ganny mete lo devlopman nou bann fasilite sportif. I malere ki sa bann fasilite pann ganny pran swen avek pandan tro bokou letan e sa I fer ki ozordi nou bezwen depans milyon pou refer zot e met zot lo standar ki zot devret ete, savedir nivo enternasyonal. Roche Caiman pe ganny transformen. Travay lo Palais de Sport, kort tenis, dojo ek stad linite pe ganny fer e byento sa landrwa pou war en transformasyon total. Mon anvi anonse ki sa lannen nou pou inogir nouvo track lo Stad Linite avek konpetison enter-skoler. Avek sa travay konplete lo en o-standar, nou ava osi retrouv konpetisyon foutbol enternasyonnal lo later Seselwa – en lot form lwazir ki nou pep in manke pandan tro bokou letan.
Mon anvi profite pou felisit nou bann zenn ki kontinyen donn nou lafyerte avek zot bann bon performans dan zot spor lo nivo enternasyonnal. Zot lenerzi I ekstraordiner e nou pou kontinyen ankouraz zot pou fer pli byen. Tou dernyerman, nou group zenn kin partisip dan en konpetisyon Moris in retourn avek meday lor. Sa I en bon sir e mon ankouraz zot pou kontinyen zot lantrennman. Noun war lekip karate Tong Soo Do osi retourn avek meday lor apre zot partisipasyon Lanmerik. Noun war bann zenn dan konpetisyon ladans an Gres osi fer nou fyer. Lo nivo lokal, plis zenn pe pran zot spor serye e sa pe permet serten ganny sans lo nivo enternasyonnal parey Pascalina Moustache ki ozordi pe zwe foutbol an Lithuania. Lazenes, kontinyen dan sa direksyon e adopte pozitivite koman zot moto lavi. Pa les zot tonm dan bann distraksyon ki pou detri zot lavenir.
La mon osi profite pou mansyonn nou bann zenn ki pe fer byen lo kote akademik. Mon pe rankontre bann kin fer byen dan zot lekzanmen enternasyonnal byento. Mon osi anvi rankontre bann returning graduates. Se zot sa bann dimoun ki pou pran larelev e non selman ki mon fyer zot lakonplisman, me mon swet zot bonn sans dan zot karyer. Lazenes, devlop zot aplen dan tou sa ki zot fer e a-tou moman, rod sa vre satisfaksyon personnel dan sa ki zot akonpli letan zot servi zot talan.
Dan tou domenn ozordi nou pe kontinyen war mouvman ek progre. Lo zil Praslin ek La Digue, nou pe war lakonplisman bann proze ki pou ede donn en meyer servis nou pep, donn zot plis konfor e fer zot war gran soulazman. Ki I konsern bann nouvo fasilite, konstriksyon lakaz ou alokasyon later, nouvo semen, resirfas semen, fasilite por, nouvo lenfrastrikir ek lezot, nou zil pros I kontinyen an mouvman. Mon fyer pou war lakantite biznes ki pe monte lo Ile Eve apre ki mon ladministrasyon in fer le neseser pou met lenfrastriktir neseser ki tin ganny neglize tou sa letan. Proze Kato Nwanr osi pou komanse byento, tandi ki proze konstriksyon nouvo terminal lo La Digue osi pe bouze li osi. Pli bon servis ek fasilite pour tou dimoun ganny pli gran konfor I reste nou priyorite.
Ser ek frer Seselwa, Nou bezwen nou tou ansanm kontinyen konstri nou pei. Lapropte nou kominote I konsern nou. Silvouple annou vin sa pep vreman konsansye. Ki nou al lo lans, regard match lo gran lekran lo stad, servi en bin site, oubyen tir salte kot nou, annou vin konsansye ki I nou responsabilite pou gard lapropte. I konsern nou koman en endividi e si sakenn I zwe son rol, nou pei pou vreman prop e nou pou konn pli bon lasante. En bon repitasyon I bon pour nou lendistri touris, me ozi pour nou koman Seselwa.
Mon kontan pou dir ki lalit kont drog pe montre diferan rezilta pozitiv. Mon ti anonse ki mon pou pran sa lalit koman en manda personnel. Noun war bokou progre, me I reste ankor bokou pou fer. Mon felisit bann diferan lazans pou travay ki zot in akonpli pou sov nou lazenes. Me an menmtan mon bezwen dir ki bann dimoun ki trafik drog I reste en group san en leker e zot rod nouvo fason pou fer larzan lo bann ki pli feb. Tou resaman noun war detrwa nou bann zenn mor avek en overdose. I annan en nouvo fenomenn kot serten endividi pe melanz tou kalite kosonyen ansanm e pe vann koman drog e sa in deza koz lanmor e lapolis pe fer lenvestigasyon. Alor fodre nou tou nou zwenn ansanm dan sa lalit.
Pandan sa bann dernyen mwan noun osi war en sinny pozitiv kot kriminalite in desann dan pei. Mon swete ki nou ava kapab gard sa direksyon e mon ankouraz lapolis pou kontinyen lev standar pli o posib e pou fer en bon travay.
Nou kontinyen fer tou pou donn nou pep bann fasilite lozman ek later. Tou dernyerman noun donn lakle bann zabitan Bel Ombre ek Corgate Estate. Byento proze Perseverance, Anse Etoile, Glacis e St. Louis I ava pare, an mezir ki nou kontinyen avek lezot, enkli Mt. Plaisir, Praslin. Lo lot kote plis dimoun pe ganny later pou komans zot konstriksyon. Mon ladministrasyon pou kontinyen reste la avek nou pep pou donn zot sa bann fasilite e parey labitid, nou senpleman demann tou dimoun pou reste responsab, fer zot kontribisyon e pran zot lozman koman pli gran priyorite.
Mon konn serten bann defi ki nou popilasyon I fer fas avek kot I konsern lasante. Mon anvi repete ki nou lasante I premyerman nou responsabilite. Noun lans en kanpanny kont lobesite akoz nou popilasyon I annan en problenm. Plis ki 50% nou popilasyon, enkli nou zanfan I tro gro e sa I lakoz plis maladi e lanmor, me osi nesesite pour plis swen medikal ki vin a en kou vreman o. Si sakenn ant nou I pran nou lasante serye e rod en lavi pli pozitiv, non selman ki nou ti pou pli an bonn sante, me sa presyon pa neseser ti pou ganny tire lo bann servis medikal e sa ti ava permet nou elev bann lezot standar.
An se moman, nou pe fer bann renovasyon neseser dan Lopital Sesel, tandi ki byento renovasyon lopital Baie Ste Anne ek Beoliere pou komanse pandan ki konstriksyon sant lasante Baie Lazare I kontinyen. Tou plan pe ganny fer pour konstriksyon nouvo Sant Lasant Anse Aux Pins lo Ile Soley avan sa lannen I fini. Me se pa zis batiman ki enportan. Se dimoun ki donn sa servis. Nou pe perdi enpe ners avek louvertir bann nouvo sant lasante prive e sa I met presyon lo servis ki nou donnen. Mon ankouraz plis zenn pou zwenn sa profesyon e fer en gran kontribisyon.
I senpleman enposib pour mwan adres tou size dan sa diskour. Me mon anvi dir zot, mon bann frer ek ser ki sa ladministrasyon pe kontinyen travay dir pour byennet tou Seselwa. Ozordi to mank laplwa I pli ba ki in deza ete, savedir tou dimoun I kapab ganny en lanplwa. Welfare ek Home Care pe regard nou popilasyon pli vilnerab avek bokou plis atansyon e pe donn lasistans. Nou lazenes pe gany pli gran sans lepanouisman, tandi ki lord ek lape I renye dan nou pei. Alor mon demande ki sakenn ant nou I pran nou pei koman nou posesyon. Pran lendistri touris koman konsern tou dimoun e donn tou sa ki nou kapab san esper lo lezot. Servi tou linisyativ ki ava ed nou avans devan e pli o.
Pandan ki nou prepar nou pou lans 3 pli gran proze ki nou pou akonpli, savedir nouvo lopital Sesel, erport avek por, I enportan pour ki nou tou koman Seselwa nou vin pli serye dan tou saki nou fer. Sa bann proze pou kout bilyon, me zot enportan pour ozordi e pour lavenir nou pei. Alor annou rode ki mannyer nou kapab fer nou kontribisyon. Nou pe kontrir en pei ki pou pran swen avek zenerasyon ki pou vini e donn nou en lavantaz dan sa monn konpetitiv. Fodre ki nou tou nou war nou dan sa bann plan.
Ser ek frer Seselwa, lo nivo enternasyonnal pti Sesel pe fer ekstrememan byen. Parfwa mon oponan I kritik mon bann vwayaz, me les mwan dir zot se sa kin fer nou ganny respe partou. Ozordi de size enportan pour ki Sesel in lager pe ganny aksepte. Enn se MVI, ki vedir pour nou ganny akse avek finansman konsesyonnel a lentere ba malgre ki nou ganny konsidere koman en pei avek en reveni O. Byento Nasyon Ini pou fer lanons apropriye. Lot se ‘Loss & Damage Fund, kin fini vin operasyonnel. Nou devret fyer ki pti Sesel in zwe en rol enportan e anmenn son lavwa dan sa demars.
Ser ek frer Seselwa, annou reste pozitiv dan lafason ki nou apros lavi. Annou kontinyelman rode ki mannyer nou kapab vin pli bon dan sa ki mon pe fer. Ki mannyer mon kapab donn en pli bon servis mon bann frer ek ser e ki mannyer mon pou reste konsernen lo sa ki pe arive dan mon pei. Annou rod akonplir sa ki byen, reste atase avek laverite e gard en leker ranpli avek konpasyon ki tous tou dimoun ki mon rankontre dan mon lavi.
I annan bokou pou fer dan nou pti pei. Me mon konvenki ki si sakenn antre nou I donn tou, e nou sorti dan en staz kot nou reste noye dan bann size nwizans e port latansyon lo sa ki enportan, ki nou pran linisyativ pour nou avans devan dan lonnekte, lakourtwazi e anmenn nou pei avek nou, nou pei pou donn nou lafyerte e nou pep pou en pep akonpli.
Mon fyer direksyon ki nou pe ale, me mon kwar ki avek plis travay dir ek pli gran devosyon nou pou al pli lwen ankor. Mon envit tou Seselwa pou kontinyen debout for pour nou pei Sesel e pou fer nou paviyon flot pli o la kot nou ete.
Ki Bondye I beni nou zoli Sesel e gard nou pep touzour anba so proteksyon.
Mersi.