State House

Office of the President of The Republic of Seychelles

News

Lansman Ofisyel Konstitisyon Larepiblik Sesel

Preziden Larepiblik, Msye Danny Faure, ti ganny loner pou resevwar prempye kopi Versyon Kreol Seselwa Konstitisyon Larepiblik Sesel pandan en seremoni lansman ofisyel dan kad bann aktivite pour komemor vennsenkyenm lanniverser konstitisyon Larepiblik Sesel kot Lenstiti Kreol ozordi apremidi.

Pandan sa seremoni bann diferan brans Gouvernman tel ki Legzekitiv, Lezislativ e Zidisyer ti osi ganny prezante ek en kopi Versyon Kreol Seselwa Konstitisyon Larepiblik Sesel ensi ki bann lezot departman e bann kin direkteman kontribyen anver sa proze.

Dan son diskour pour ofisyelman lans sa nouvo  piblikasyon, Set Egzekitif Lenstiti Kreol Sesel, Madanm Flora Ben David, ti retras parkour bann travay kin ganny fer pour realiz sa proze, remersye bann partener kle kin travay ansanm pou ki ozordi Konstitisyon Larepiblik Sesel in reisi ganny tradwir dan en lalang standar zidisyer ki annan son bann laform e lareg. I ti osi souliy lobzektif e met lanfaz lo travay kontinyel anver promosyon lalang maternel; lalang Kreol Seselwa.

“Lobzektif en tel travay se ofer loportinite lepep Seselwas pou aksed konteni lalwa konstitisyonel dan nou lalang maternel, enn parmi bann draw ki’n preskrir dan nou Konstitisyon,” Madanm Ben David ti azoute.

Lenstiti Kreol Sesel ti osi pandan seremoni relans son sit web e Versyon Kreol Seselwa Konstitisyon Larepiblik Sesel pou aprezan disponib lo sa sit.

Seremoni ti ganny animen par diferan artis lokal tel kin poet Reuben Lespoir, Santer Travis Julienne, ensi ki bann zanfan lekol Au Cap ki ti perform bann morso patriyotik pour lodyans.

Osi prezan pour sa seremoni kot Lenstiti Kreol Sesel  apremidi ti Prezidan Lakour Dapel, Msye Fancis Macgregor, Sef Ziz Lakour Siprenm, Madanm Mathilda Twomey, Minis Dezinyen, Madanm Macsuzy Mondon,  Dirizan bann Zafer Governman dan Lasanble Nasyonal, Msye Charles Decomarmond, Bann Minis, Prokirer Zeneral, Msye Frank Ally, Bann Ziz Lakour Dapel e Lakour Siprenm, Ombudsman, Tyermenn e Sef Ekzekitif, bann manm Lasanble Nasyonal, e lezot envite distenge.