October 30.2012---ki en se moman dan pei pour Festival Kreol, e pour Rankont bann Madanm dan Politik Losean Endyen, organize par Komisyon Losean Endyen.

Prezidan ti rankontre Prezidan Konsey Zeneral Zil Larenyon Madanm Nissimah Dindar, ki osi an sarz Lasosiasyon bann Madanm dan Politiki Losean Endyen. I ti akompanye par Madanm Minis Mireille Martin(Moris), Madanm Mroudjae Moinaecha (Komor),Madanm Aurelie Razafinjato(Madagaskar), Madanm Fatoumia Ali Bazi(Komisyon Losean Endyen),  Madanm Marie Therese Clair-Brault (Rodrig) e Ambasader Marie-Pierre Lloyd(Sesel).

Zot ti diskit progre ‘ekstraordiner’ ki Sesel in fer dan domenn developman drwa bann madanm ek fiy. Lanbasader Marie-Pierre Lloyd in fer resorti ki la mazorite sa bann delege, in dir ki zot kontan ki sa trwazyenm rankont in ganny fer isi Sesel akoz i ganny vwar koman en model dan larezyon, en pwen referans anvi ki Sesel i pli avanse lo bann zafer ki konsern madanm sirtou dan bann pozisyon kot pou pran desizyon dan politik ek zestyon pei.
Madanm Nassimah Dindar in osi felisit lakonplisman bann madanm Seselwa.

“Sesel i en legzanp pour tou bann pei dan losean endyen vi k i annan bann madanm dan gouvernman, madanm anbasader e osi volonte pou travay koman en fanmiy kot saken i annan son plas pour kiltir kreol. En madanm i devret ganny respekte e osi sa “fil conducteur d’un mode’ devlopman pou en pei, » Madanm Dindar in dir.


Prezidan Michel ti osi rankontre avek Madanm Dindar separeman pour diskit kooperasyon ant Sesel ek Larenyon, sirtou dan domen tourizm, ledikasyon ek lesanz kiltirel, avan vizit ofisyel ki Prezidan Michel pou fer Larenyon an novanm.

Sef Komisyoner Rodrig, Msye Serge Clair ti osi rann en vizit kourtwazi Prezidan James Michel. Msye Clair ti enn bann envite spesyal pour louvertir Festival Kreol semen pase.Msye Clair in dir ki sa i son dezyenm vizit isi Sesel e i touzour en plezir pou li zwenn avek Prezidan Michel. Zot in diskit diferan topik ki annan pou fer avek bann zil dan larezyon losean endyen, sirtou kolaborasyon ant bann  lantrepriz pti ek mwayen grander, ek tourizm « Bann Zil Vaniy .»

« Depi 2002, zil Rodrigues in ganny en stati otonomi rezyonal [dan Larepiblik Moris] e sa i vreman enportan akoz in permet nou devlop bann relasyon avek lezot zil dan losean endyen e osi devlop en relasyon avek Sesel ki zisteman nou isi pou Festival Kreol, » Msye Clair ti dir.

Prezidan Michel ti osi rankontre Sekreter Zeneral Komisyon Losean Endyen, Msye Jean-Claude de L’Estrac, lefet ki Sesel i an se moman pe tenir Prezidans  Komisyon Losean Endyen e pe diriz bann diferan diskisyon rezyonal. Zot in pas an revi bann diferan topik dan travay Komisyon Losean Endyen.