January 28 2012 -- Prezidan James Michel, ki osi prezidan Parti Lepep, in ouver 26yem Kongre Nasyonal Parti Lepep ozordi apremidi, avek en deklarasyon ki sa kongre i « en nouvo letap dan modernizasyon ek konsolidasyon » Parti Lepep avek bi pour vin pli « proaktif, ki zis dan son lapros, ki disiplinen, e ki pe kontinnyelman rod fason pour reste konekte avek lepep. »
Sa kongre in ganny organize prensipalman pour konstitye nouvo leadership, avek eleksyon nouvo Komite Santral ek Prezidan parti, ki pou ganny fer demen. Dernyer eleksyon Komite Santral sa parti ti an 2005. Prezidan Michel in ganny nomine koman Prezidan parti pour en dezyenm fwa.
Prezidan Michel in remersye per-fondater SPUP-SPPF Prezidan France Albert René pour tou sa k'in fer pour lepep Seselwa, e in reafirme latasman Parti Lepep avek bann valer ek tradisyon SPUP-SPPF, avek bi pour moderniz Parti Lepep pour bann nouvo zenerasyon manm sa parti.
« Nou bezwen en melanz leksperyans ek kontinyite lo Komite Santral. Nou bezwen bann dimoun eksperyanse pou ankadre bann zenn ki pe monte, pou enstrir zot. Zot vwar sa koman en loportinite, koman en devwar e nonpa koman en menas pour zot pozisyon, » Prezidan Michel in dir.
Prezidan in osi rapel tou manm ek siporter Parti Lepep, bann prensip ki devret gid zot dan zot travay.
«Annou, avan tou, gard nou sans limilite. Zot bezwen donn legzanmp par zot konportman, par zot latitid. Zot bezwen montre senserite ek konpasyon dan tou sa ki zot fer. Travay dir pour lepep. Zanmen mazin zot gen ou lavansman personnel. Se lentere nou frer, nou ser, nou pei ki konte avan tou. Reste konekte avek lepep. Se sa ki pou asir nou sipor. Se sa nou rezon-det koman en lafors-viv lanasyon. »
Prezidan Michel in promet ki Parti Lepep pou reste konekte avek lepep, e ki son parti pou reste o-servis lepep otan ki lepep i bezwen li.
Read Speeches: Kreol