28 October 2026 |.
Ser pep Seselwa,
Ozordi, anmezir ki nou zwenn ansanm avek bann kominote Kreolofonn atraver lemonn pour selebre Lazournen Enternasyonal bann Lalang ek Kiltir Kreol, mon anvi adres sak Seselwa avek en mesaz lafyerte, linite ek lespwar.
Nou en pti nasyon dan Losean Endyen, me nou annan en gran listwar, en lidantite for ek en leritaz kiltirel ki fer nou annan nou prop plas dan lemonn.
Nou pep in ne atraver rankont diferan sivilizasyon, diferan lorizin, diferan langaz ek tradisyon. Dan sa diversite, nou bann zanset in reisi konstrir en keksoz ekstraordiner: en sel pep, avek son prop lalang, son prop kiltir ek son prop lidantite.
Sa i nou pli gran larises. Sa i lafors Sesel.
Ozordi, nou selebre pa zis nou lalang ek nou kiltir, me sa ki nou ete konman en pep e sa ki fer nou inik konman en nasyon.
Dan sa lannen kot Sesel pe selebre 50 an son Lendepandans, nou Kreolite i rapel nou sa semen ki nou'n traverse ansanm, nou bann rasin, nou bann valer e sa lafors ki'n permet nou konstri en sel nasyon apartir diferan lorizin.
Nou kiltir i nou fondasyon, nou lalang i nou lavwa, e nou lidantite i sa ki donn nou konfyans pour avanse dan lemonn.
Me nou pli gran responsabilite ozordi se pa zis pour prezerv sa leritaz. Se pour fer sir ki i reste vivan, ki i evolye e ki nou bann zanfan i kontinyen trouv dan li en sours lafyerte ek lenspirasyon.
Anmezir ki nou konstrir lavenir Sesel, annou pa zanmen oubliy sa ki fer nou Seselwa.
Parski en nasyon ki konn son rasin, i annan lafors pour konstrir son desten.
Mon swet tou Seselwa, isi e aletranze, ek tou bann pep Kreolofonn, en bonn fet Lazournen Enternasyonal bann Lalang ek Kiltir Kreol.
Viv nou Kreolite! Viv Repiblik Sesel!
