07 April 2026 | Health.
Le 7 Avril, lemonn i komemor Lazournen Mondyal Lasante, e nou, isi Sesel, nou komemor Lazournen Travayer Lasante ansanm avek li. Mon gouvernman ek mwan, nou salye kontribisyon enpresyonan tou bann zonm ek fanm, lepase, leprezan, e lefitir, ki’n travay e ki pou kontinyen travay pour fer e pour gard nou sistenm lasante koman enn parmi bann meyer dan Lafrik e dan lemonn.
Tenm sa lannen, "Ansanm pour Lasante. Debout avek Lasyans," i koz direkteman lo nou lafors kolektiv. I fer nou rapel ki lasante I pour tou dimoun, pa zis pour en bann. I demann nou pour annan konfyans dan levidans, dan lekspertiz, e dan bann prensip ki protez lavi.
Atraver nou bann lopital, klinik, ek kominote, nou bann travayer lasante I promouvwar sa bann ideal. Zot sarye pwa sa kat gran misyon swen lasante: prevansyon - savedir anpes maladi avan I komanse; proteksyon - savedir protez nou pep kont ditor lo son lasante; promosyon - savedir promouvwar stil lavi ki bon pour lasante; e restorasyon - savedir re-etablir fonksyon lekor ek dignite apre maladi.
Nou konnen sa pwa ki bann travayer lasante i anmennen. Nou'n temwanny zot bann sakrifis, nou’n vwar lafatig deryer zot bann sourir rasiran e bokou plis ankor. Se pour sa rezon ki nou pe travay dir pou amelyor zot kondisyon travay, kre bann lanvironnman pli an sekirite, donn plis formasyon, e ogmant lakantite travayer lasante.
E pasyan pe komans santi sa sanzman. En travayer lasante ki ganny siporte i delivre pli bon swen, i donn plis latansyon, e i montre plis konpasyon. Ler nou envestir dan bann travayer ki donn swen, nou pe envestir direkteman dan lasante sak Seselwa.
Ansemoman, nou dan prosesis konstrir en nouvo lopital: en fasilite modern, lo nivo mondyal ki nou vreman bezwen e merite. Pour pasyan, sa pou vedir mwens letan espere, tretman pli avanse, lanvironnman pli apropriye pour swen e swen pli pre kot lakour. Pour nou bann travayer lasante, sa i vedir en landrwa travay ki koresponn avek zot dedikasyon.
Mon gouvernman pe envestir dan tou sa bann gran ideal lasante. Sak Seselwa i merit gerizon avek dignite. Lasyans i bezwen gid nou lanmen e konpasyon pa devret zanmen diminyen anba stres.
Pour sa Lazournen Mondyal Lasante e Lazournen Travayer Lasante 2026, koman en nasyon, nou reafirm Lasante koman fondasyon konstriksyon nou sosyete e nou onor bann ki fer sa fondasyon toulezour touzour pli for.
