Depi mon ti lans kanpanny nasyonal pou redwir obezite dan nou popilasyon adilt ek zanfan, par apepre 2% par lannen 2030, in annan en konsyantizasyon remarkab dan nou sosyete lo sa size obezite e lo ki mannyer obezite i afekte lasante.

 
Ozordi nou tou nou konnen ki obezite i antrenn dyabet, tansyon, latak leker, latak laservel,  maladi ronnyen e plen lezot maladi ankor. Nou konnen ki i osi asosye ek kanser e ki tou sa bann maladi i kapab okazyonn lanmor prematire ek dezabilite. Sa bann maladi ek kondisyon zot osi redwir nou prodiktivite ekonomik e zot kout lasosyete en kantite resours pour sonnyen.

Ler nou ti met sa target pour redwir obezite par 2%, serten ti dir ki i tro anbisye e ki nou ti devret zis esey fer to obezite pa mont plis ki sa ki ti ete an 2023. Sa ti baze lo leksperyans lezot pei ki ti’n vwar li tre, tre difisil pour redwir obezite se zot.  Me nou,  nou ti determine e nou ti met labar relativman o.

Lankourazman ek satisfaksyon, ki mon santi ozordi, apre enn an edmi sa kanpanny,  se ki tou dimoun isi  Sesel i  konnen  aprezan ki i pa bon ler en dimoun i tro gro. I annan en gran kantite dimoun ki toulezour  pe vreman seye avek bokou zefor pour perdi pwa. Mon kapab dir, san ezitasyon, ki sa kanpanny pe marse lo sa nivo. E mon demann nou tou pour kontinye sa bann zefor eksepsyonnel ki nou pe deza fer. Annou kontinye angaz nou, avek ankor plis entansite, dan bann aktivite fizik ki organize dan bann landrwa travay, dan distrik, dan fanmir e dan bann lekol.

Sepandan, mon bezwen met lanfaz lo lefet ki menm si legzersis e aktivite fizik i neseser pour redwir obezite, zot pa sifizan, lo zot menm.  Nou bezwen osi reaziste  sa ki nou konsonmen, savedir sa ki nou bwar e manze, toulezour. Nou bezwen redwir lo volim tou sa ki nou konsonmen e ki nou konnen pa bon pour lasante. Annou evite konsonm sa ki tro dou, tro sale e tro gra e sa ki annan lalkol ladan. Annou evite manz an ekse, sirtou  bann manze, parey pizza, spageti, diri, dipen, ki bokou tro ris an idrat karbonik e ki nou lekor, ler  i pakapa bril tou, i  zis konverti sa e i stok li koman lagres e la, nou war nou vant i komans gonfle. Annou okontrer manz byen nou pwason, nou legim, nou bred lokal, nou satini etc. Nou bann fermye ek peser pe fer bokou zefor pour met tou sa la a nou dispozisyon.  Sa bann manze, zot pa bann manze lamizer, parey serten i kontan dir, me okontrer zot bann manze ki annan tou sa ki neseser pou gard nou an bonn sante. Annou prefer zot, e annan manz plis sa ki bon pour lasante. Si nou pa sanz kalite ek kantite keksoz ki nou manze, nou pa pou kapab redwir obezite dan en fason dirab, menm si nou fer en pe legzersis tanzantan.

Ozordi alokazyon, lazournen enternasyonal pour redwir obezite, mon reaffirm langazman solid gouverman Sesel pour kontinyen  siport tou aksyon pour redwir obezite, e anfezan sa,  redwir maladi e ogmant byennet ek prodiktivite ekonomik nou pei.