31 December 2024 | State House.
Ser ek Frer Seselwa,
Lespwar pour en meyer demen I depann lo sa ki nou konstri e met ansanm ozordi. Nou reisit, sikse e travay dir an 2024 pou determinen ki mannyer 2025 pou ete. Malgre bann enprevi, nou resilyans, planifikasyon ek determinasyon pou permet ki lobstak I ganny sirmonte, defi I ganny konverti dan loportinite e negativite dan pozitivite. Mon napa okenn dout ki se sa vre lespri ek leker kreol ki bat dan nou. Alor, mon anvi swet tou Seselwa e tou dimoun ki annan en koneksyon avek nou zoli Sesel, sa ki meyer, sa ki met sourir lo figir e sa ki donn nou kouraz pou swiy lapousyer defet e remet kouraz e determinasyon koman prensip bouz devan.
Premyerman, mon anvi dir mersi tou Seselwa ki’n donn zot leker nou zoli Sesel pou fer li bouz devan. Tou sa travayer kin travay konsyansyezman pou lev Sesel ek Seselwa pli o posib toulezour. Dan zot travay, zot pann regard zot mont oubyen revey, me plito rode ki mannyer pou termin sa latas ek servis ozordi e pa demen. Ki ou dan gouvernman oubyen dan sekter prive, oun fer en keksoz: Met Sesel avan tou. Felisitasyon e mon swet ou kouraz renouvle.
Pour nou bann zenn ki ankor pe etidye, ki ou dan primer, segonder, pos segonder oubyen liniversite e dan bann lezot lenstitisyon, e kin travay dir an 2024, zot in osi fer li pour Sesel. Lazenes ki montre bon legzanmp, bann zenn antreprener, nou profesyonnel, bann ki dan zot karyer lwazir zot donn nou sa ki bon menm, sa ki fer paviyon Sesel monte dan sport, e tou zenn ki krwar dan sa Sesel e pe donn tou, zot in kontribye pou fer Sesel avanse. Mersi bokou e kontinyen dan sa bon semen. Pa rekile, e pa retourn an-aryer. I annan en sel larout pou pran: An avan pour Sesel!
Mon anvi osi rekonnet tou Seselwa kin pran zot retret. Zot, nou granmoun, bann manman, papa, gran manman ek granpapa, ki dan zot lizye I annan sa lalimyer reisit atraver zot kontribisyon pou anmenn Sesel kot I ete ozordi. Mon dir zot mersi. Kontinyen partaz zot lasazes, konesans e diriz nou dan bon semen touzour. Pour sa ki zot in fer pour nou, zanmen nou pou oubliye. Okontrer, an 2025, nou sosyete pou kontinyen siport zot e pran swen avek zot bezwen. Gard Sesel ek tou son zanfan tou lezour dan zot lapriyer.
Ser zanmi, an 2024, noun travay dir pour nou pei. Dan plizyer domenn, noun fer byen e noun menm vin en legzamp rezyonnal e mondyal. An 2025 fodre nou kontinyen mars lo sa semen pozitivite. Tou loportinite I la pour sak zanfan Seselwa reisi. I depann alor lo sakenn ant nou pou sezi tou sa ki ganny prezante, aplik nou e bouz devan. Mazinen ki se pa semen ki koz aksidan, me se lafason ki nou servi sa semen ki lakoz aksidan. Alor prepar nou byen parey letan nou pe al dray: Fer sir nou azen, nou an-kontrol e nou pou respekte lezot ki servi sa semen e ki nou pou swiv lalwa apropriye. Dan sa fason, reisit I ava vin trezor sakenn antre nou, e nou tou ansanm nou ava zouir benefis nou travay, rekolte dibyen ki sosyete I met a nou dispozisyon e viv byen dan larmoni e dan lanmour. Nou kapab fer sa arive dan nou zoli Sesel. Mon swet nou tou kouraz pou lev nou paviyon e nou pei pli o posib.
An 2025, mon priye ki sakenn ant nou I aret kree bann prizon pour nou menm. Savedir, annou rod sa ki bon pour nou menm, pour nou fanmiy, pour nou zanfan, nou kominote e pour nou pei. Sorti dan ladiksyon bann vis ki fer nou vin lesklav e prizonnyen, me pli pir ki fer bann ki otour nou osi vin prizonnyen e viv dan soufrans. Annou sorti dan ladiksyon drog ek lalkol, ladiksyon kazino, ladiksyon kriminalite, ladiksyon rann lavi lezot fermal, ladiksyon viv andeor lalwa. Annou vin bann sitwayen ki respekte nou prosen e realize ki sak drwa ki nou annan I swiv avek responsabilite. Legzanp pli senp ki avar ed nou se pou mazinnen ki I nou drwa al lo lans pou fer piknik, me I nou responsabilite pou retourn ek tou nou salte se nou. Rezilta: Nou pei pou prop. I nou drwa zwe nou lanmizik e enjoy, me I nou responsabilite pou pran konsiderasyon pour nou vwazen ki pe etidye, ki malad, ki an dey, ki bezwen lev gran maten pou al travay. Rezilta: Nou pou viv an bon vyazinaz dan lazwa. Alor briz bann prizon e vin bann Seselwa ki montre respe e ganny respe an-retour.
Parey an 2024, an 2025, gouvernman pou kontinyen delivre pour son pep. Kot I mal, byensir nou ekspekte nou sitwayen fer tande zot lavwa e nou a nou tour, nou ava fer sa ki dan nou posibilite pou korize, sanze e amelyore. Mon ekspekte ki tou travayer dan sekter prive e piblik I servi sa logmantasyon lapey dan meyer fason posib. Mon osi atann ki tou programme pour dimoun avek bezwen spesyal I ava ganny itilize dan fason ki pou ede rann zot pli konfortab e ere. Pei pe envestir dan son popilasyon e mon napa okenn dout ki lepep Seselwa pou servi a zot benefis sa bann lavantaz pou amelyor zot lavi an mezir ki zot regard byenet tou dimoun
Byensir, nou pou osi kontinyen regard lenfrastriktir nou pei afen ki plis lakaz I ava ganny konstri, plis later ya ganny met a-dispozisyon nou popilasyon e lezot mwayen pou pli gran konfor nou popilasyon I ava osi ganny akonpli. Me o-fir e a-mezir ki gouvernman I devlop sa bann fasilite, mon senpleman fer en lapel avek nou popilasyon pou prezerv sa bann menm fasilite afen ki zot ava dir pour plis letan. Mazinen ki depans larzan travayer ki al dan sa bann lenfrastriktir. Letan nou kase oubyen abize, se nou menm ki bezwen repeye apre. E olye fer lezot keksoz, nou bezwen refer sa bann ki ti la e sa byen sir pou retard nou devlopman.
Frer ek Ser Seselwa, se nou ki pou devwal 2025. Nou pou resevwar nouvo Seselwa e nou pou dir orevwar bokou Seselwa. Lazwa, latristes, leksitasyon, dezapwentman, sourir, larm e tou santiman pou anbras nou. Mon lapriyer se ki sakenn antre nou, nou reste debout for, analiz byen sa lavi, fer bann bon swa, pik lo sa ki pou ed nou avans devan pou akonpli nou rev e lanbisyon. Servi byen sa kado lavi – aprann partaze a tou moman, pran bon desizyon e les nou ganny dirize par nou kreater ki nou tou nou rekonnet e kontan. Mazinen ki nou bezwen pran kontrol nou lavi e pran bann bon desizyon. Lavi napa bouton ‘rewind’, ‘reverse gear’ oubyen bouton ‘delete’. Me selman lavi I toultan donn nou en dezyenm ou menm en trwazyenm sans. Servi zot byen e an 2025 akonpli nou rev personel, ranforsi nou fanmiy, nou kominote ek nou pei. Annou kree en monn meyer kot lape, lazwa ek sourir I akeir nou sak zour.
Mon swet tou Seselwa ki viv Sesel e a-letranze prosperite, boner, lasante ek lasazes. Ki lalimyer Bondye Toupwisan I rankontre nou kot laport 2025 e akonpanny nou sak zour a sak moman.
Ki Bondye Toupwisan I beni Sesel ek tou Seselwa.
Bonn Ane 2025
Wising you a blessed and prosperous 2025.
Bonne et Heureuse Année 2025
