07 December 2024 | State House.
Frere ek Ser Seselwa espesyalman bann zabitan Cascade e dan nor Mahe
Ozordi le 7 desanm , Byensir nou vini avek bokou latristes pour nou komemor sa ki ti arive dan nou pei ant le 6 ek le 7 desanm 2023. Premyerman, dan lenor ti annan bann kalamite koze par gro lapli. E depi tar dan lannwit le 6, tou nou latansyon ti baze lo kimanyer pou nou sov lavi. Malerezman lavi ti perdi. Ozordi premye lanniverser lanmor bann viktim, mon anvi ankor enfwa eksprim mon senser kondoleans avek tou bann fanmir pou lanmor Dorothy, Yassent ek Hakim.
Me malerezman pandan ki nou ti pe esey rezourd problenm dan nor, kot gro lapli tin anvair bokou lakour pou koz bann glisman teren, pou fer flooding, e kot bokou lakaz ti ganny andomaze, nou ti trouv nou pe fer fas avek en lot kalamite, e sa sete leksplozyon kot CCCL ki ti afekte en kantite lakaz. Nou ti trouv nou souden pe al ver Cascade, pour nou pran swen avek nou bann dimoun. Nou servis lasante ti bezwen komans travay anplis.Nou tou nou rapel manyer nou bann dokter, nou bann ners, tou dimoun ti koste ansanm pou donn en koudmen e pour fer sir ki dimoun I resevwar sa swen apopriye. Tou bann diferan lazans ti koste ansanm, me malerezman sa dega ki tin arive, ti tro bokou pou nou.
Alor, ozordi letan nou pe mazin sa bann levenman, e mon byensir lefe ki monn la avek bann zabitan, ansanm avek bann dimoun dan bann lezot lazans, tou sa bann levennman I ankor parey yer. I ankor parey konmsi mon pe mars dan tou sa bann dega, pe regard tou sa bann lakaz andomaze. Pe partaz dan soufrans bann larm kin ganny verse, e ki manyer noun bezwen debourye depi premye moman. Alors mon anvi ankor enfwa remersye tou bann diferan dimoun, kin vini koman zanmi bann victim, kin vini koman bann etranze total, me akoz ti annan maler zot in vin montre solidarite. Mon anvi remersye bann landwa kin ofer lospitalite, pour resevwar bann ki ti napa en landwar pou zot dormi. Bann dimoun kin fer bann donnasyon, bann dimoun kin esey fer tou sa ki zot kapab. E la ankor ennfwa mon anvi dir zot en gro mersi.
Me mon konnen ki poudir dan sa 1an, i annan bokou keksoz kin arive, e la letan mon pe koz avek zot, I ankor annan keksoz ki nou pe fer. I annan bokou lazans ki pe koste ansanm, pour asire ki lavi I retourn pli normal ki posib. Me anmenmtan, mon realize ki pou dir, I annan ankor bokou pou fer. Pa tou dimoun ki malgre ki zot lakaz in ganny aranze, ki petet zot lakour in aranze, petet I ankor annan dimoun ki pe esper serten travay ganny fer. Oubyen pou rekonstriksyon zot lakaz ganny fer, oubyen pou en miray ganny monte, kot pandan sa kalamite in ganny detri. Alors,mon remersye zot osi, tou bann victim, pour zot pasyans e la mon anvi dir klerman, ki poudir pandan sa 1 an gouvernman in fer tou sa ki I kapab. Tou, tou, tou saki nou kapab, la mon kapab donn zot serten sif. Pandan sa sa bann letan, pandan sa 1 an Gouvernman atraver ASP in depans en total 21.5 milyon roupi, kot PMC zot in depans 7.8 milyon roupi, e zika prezan letan semen prosenn, atraver SIA zot avar fer lezot depans zot avar pey dimoun sa ki noun tonm dakor lo la zot avar depans en total 57 milyon roupi. E sa I fer antou pandan sa 1 an, Gouvernman litousel in depans en total 86.3 milyon roupi , e sa san kont larzan ki lasirans in peye. E mon okouran ki pou dir lasirans in antre pou asiste bann dimoun ki ti annan lasirans, e osi bann biznes ki ti annan lasirans. E la ankor ennfwa I en moman pou dir mersi, meris pou tou bann dimoun kin kontribye dan sa fon ki ti ganny etablir e anplis ki sa mersi pou tou bann Pei Zanmi, e bann lorganizasyon enternasyonal kin vini pou ed le pep Seselwa. En gro mersi por zot kontribisyon.
Me Ozordi mon konnen ki poudir , enn bann keksoz ki ankor dan lespri bokou dimoun, e meeting ki ti fer Cascade organize par “One Voice” ek Gouvernman ekot CCCL osi tou ti la prezan, Kestyon se kan eski nou pou konnen kwa kin arive,tanto mon anvi partaz enn de lenformasyon an relasyon avek sa lenvestigasyon. Monn konsilte avek biro Attorney Zeneral, e premye keksoz monn ganny dir se malerezman, I ankor annan serten bann eleman ki bezwen ganny etabli, enn sa bann eleman I vin baze lo sa ki gard, sa jeep kot ti annan sa de gard ki zot kouraz ti anmenn zot la kot leksplozyon ti arive. Sa ki zot ti war sete dife,sete lader rouz e se sa osi tou ki ti fer ki Fire brigade to ganny apele. Erezman Fire brigade ti al providans, paske si Fire brigade ti mont kot CCCL, nou ti riske annan lavi ki ti poun perdir. Alors keston ki poze se avek gro lapli, avek tou sa bann move letan ki manyer en dife ti pran. Eski ti annan foul play? eski en dimoun in met dife? Ki manyer sa leksplozyon limenm ti arive ?. E sa la kot bann eksper ki lapolis pe koz avek pe determinen kwa ekzakteman kin arive, Sa I enn.
Dezyenman, se pour regarde eski ti en aksyon pirman kriminel kot tie n keksonz ki nou pa konnen lekel in fer par espre. Alors se pour sa rezon ki mon bann frer ek ser Cascade, Petit Pari spesyalman, annou atann ankor enpti git letan, e sa bann kestyon I avar ganny reponn. E atraver sa larepons nou avar konnen manyer pou nou avans pli devan, pour nou ganny solisyon. Me anmenmtan osi leksplozyon ti ariv kot CCCL. E se pour sa rezon ki CCCL dan sa meeting ki ti fer avek bann zabitan Cascade, pe koz lo en fason lo ki manyer pour avans devan. Si fodre met bann sarz kriminel kont nenport ki, bann sarz criminal avar ganny mete, e sa se responsabilite Attorney Zeneral. Si lo lot kote nou trouve, en lenvestigasyon ki anmenn nou dan lezot direksyon ankor enn fwa mon promet zot en keksoz, Parey mon pe koz avek zot aswar e parey toultan monn fer avek lepep Seselwa, Mwan mon premye ki pou vin devan pou vin koz avek zot lo ki manyer keksoz pe deroule. Me antretan Gouvernman pann zis reste trankil, Gouvernman in komans bann konversasyon avek CCCL pou etablir en fon. E sa fon I pa en fo Gouvernman, e sa fon parey I ti ganny esplike avek bann Zabitan, ki avar ganny manage par enn ou de dimoun endepandan. E li CCCL depandan lo ki manyer bann konversasyon I deroule si I pou rekomans prodiksyon. Larzan avar ganny mete dan sa fon. E Larzan Konpansasyon i avar al pour bann rezidan zot menm zot, e osi bann biznes kin ganny afekte avek sa leksplozyon. Fodre pa ki nou bliye se pa zis rezidan ki ti afekte, pa zis bann lakaz rezidansyel kin ganny afekte, me bokou biznes in osi ganny afekte e zot in fer pert e alors zot osi tou zot devret resevwar konpansasyon apopriye.
Alors konversasyon pe kontiyen e lasosiasyon One Voice e bann zabitan zot in donn en peryod letan. Me mwan mon ti a kontan vwar ki avan lannen I fini, Ki nou fer sa dezyenm meeting pour nou tonm dakor lo ki manyer pou avans devan, ki manyer pour kre sa fon e ki manyer sa I avar permet bann zabitan resevwar sa konpansasyon ki ava ed zot. Me Selman la ankor ennfwa mon anvi dir avek tou dimoun, konpansasyon pa pou vin enselkou, paske I annnan bokou dimoun kin ganny afekte, alors letan nou koze nou avar regarde ki manyer sa konpansayon I avar kapab ganny partaze.
Mon bann frer ek ser mon konnen ki poudir le 7 desanm I pou reste koman en zour kot nou memwar pou mazin sa kalamite, enn bann pli gran kalamite ki sesel in fer fas avek. Nou bezwen avans de lavan avek konfiyans ki pou dir nou pou kapab refer nou lavi konpletman eki nou pou repran, e sa lespri rezilyans ki annan dan lepep Seselwa I pou ankor ennfwa reniye. Mon konnen ki poudir pou annan bann servis, da Cascade li menm li pou annan de selebrasyon relize , nou konnen ki poudir Belonm osi tou I pou annan selebrasyon relizye. Alors mon anvi dir avek lepep Seselwa ki parey zour , sa de zour kalamite, mon mon ti la prezan lo zot kote, ankor ennfwa mon donn zot mon parol ki poudir mon pou akonpany zot e mon pou fer tou sa ki mon kapab . E letan mon pe dir mwan, mon pe dir tou bann lazans Gouvernman nou pou fer tou a ki nou kapab.
Ser ek frer mersi bokou zot tou ki ankor pe mazin tou bann victim, ankor pe priye pou ki nou kapab retourn normal. E ozordi ankor ennfwa mon dir ek lepep Seselwa annou kontiyen priy pou nou pei sesel pou ki sakfwa ki annan en kalamite, nou tou nou avar debout ansanm koman en sel pep koman en sel nasyon , pou nou montre ki nou Seselwa nou pou toultan montre solidarite e a nou pou ankouraz bann ki feb, nou pou atrap lanmen nou frer ek ser pouki ansanm nou kontiyen konstri en pei ki fer nou fyer.
Lo sa zour tris mon eksprim ankor ennfwa mon senser kondoleans anver tou bann fanmir anver tou bann zanmi , ki pe viv avek larm dan zot lizye ozordi. Tou kouraz ek tou benediksyon ki bondye I kontiyen beni nou pei sesel e tou nou zabitan.
Mersi bokou
