10 March 2023 | State House.
Mersi bokou Mr Speaker pou ou lakey dan Lasanble Nasyonal.
Mon adres tou nou bann Distenge Envite,
First Lady,
Vis-Prezidan Mr Afif, Mrs Afif.
Sef Ziz Lakour Siprenm.
Prezidan Lakourdapel.
Designated Minister,
Tou bann Minis,
Onorab Leader
Lopozisyon e Onorab Bernard Georges,
All the Members of the Diplomatic Corps,
Attorney General,
Komisyoner Lapolis,
Sef Lafors Defans.
Direkter Zeneral, SIS.
Deputy Speaker, Ziz ek bann Justices,
Chairpersons of Constitutional bodies,
Tou bann Envite,
Mesdames etMessieursenkli byensir tou bann staff Lasanble Nasyonal e ser pep Seselwa,
Mr Speaker, les mwan premyerman prezant mon ladmirasyon pou ou koman Speaker. E pou Lasanble Nasyonal pou travay ki zot pe kontinyen fer.
Sa nouvo fason asize dan Lasanble, pou mwan koman en vye Manm sa Lasanble, mon trouv li enn ki enteresan. E mon pa tro sir si sa ti pou mon stil, me mon swete ki dan sa lespri - e taler letan mon'n ekout ou letan ou fer ou diskour ki focus i ava plis lo Speaker. E alors mon espere ki travay dan sa Lasanble pou sa lannen 2023 e sa bann lannen ki pe vini, i ava en travay serye, alaoter.
E atraver aksyon sak Manm Lasanble, sak caucus nou ava pe montre nou bann zanfan bann meyer legzanp, lo ki mannyer nou devret azir koman bann Leaders dan nou pei. E sa i ava fer ki letan nou lev standar, nou pei li menm li i ava mont bokou pli o.
Ozordi mon osi anvi dir avek Lasanble, felisitasyon pou zot 30an. E byensir 30an Lasanble Nasyonal i osi vedir ki nou Konstitisyon in ariv 30an.
E mon mazinen ki bann komemorasyon i ava kapab ed nou, pou nou donn en pli gran valer nou Konstitisyon e tou bann lenstitisyon anba ki, dan ki i ganny kree.
Mr Speaker mon anvi osi, felisit tou bann MNAs pou bann eleksyon ki zot in pas ladan, e kot zot in ganny elekte dan bann lenstans ek bann lenstitisyon parlmanter enternasyonal. Mon swet zot bonn sans dan zot bann responsabilite.
Me Mr Speaker, mon anvi an partikilye felisit ou koman nouvo Prezidan SADC-PF. Sa lorganizasyon ki pe rod son transformasyon pou vin en parlman SADC, i enn parey ou konnen ki annan tou mon sipor e sipor Gouvernman.
E alor mon swete ki dan sa gran responsabilite pou ou trouv sa transformasyon, ou ava ganny tou lasazes pou ou kapab fer sa arive, avek sipor bann lezot parlmanter.
Alor mon anvi remersye zot ankor enn fwa pou travay ki zot in deza fer pou nou pei Sesel;- tou bann Lalwa - 39 ki zot in pase lannen pase. E deza la i annan en progranm ase sarze, ase ranpli pou zot delivre.
Alor mersi bokou. Kontinyen donn nou pei meyer Lalwa posib e an menm tan ki Lasanble Nasyonal i vin sa landrwa kot standar i mont bokou pli o e en legzanp pou nou bann zanfan.
Mr Speaker in annan bokou panse ki'n pas dan mon lespri, letan mon pe prepare pou delivre SONA. Bokou lide e ennler mon’n menm dir be eski mon pou vin zis fer speech, oubyen eski SONA ozordi i pa ti ava pli bon si mon ti ava debout la e mon ti ava reponn kestyon tou bann Manm Onorab, ki zot lentere byensir i nou pei Sesel. E atraver sa Seselwa ti ava kapab konn larepons ki zot pa konnen. E an menm tan osi petet tou bann Manm Lasanble ti ava kapab fer en lot refleksyon.
Alors Mr Speaker mon’n deside pou fer tou lede. E ki mannyer mon pou fer sa? Ozordi mon pou delivre en diskour, me apartir Pak sa lannen - zis koman nou ava pas Pak ansanm avek Konsey de Minis, nou’n pran desizyon pou fer 26 meeting piblik.
Nou pou al dan tou bann distrik. E la mon kont lo sipor tou bann Manm Elekte dan zot distrik pou zot ankouraz popilasyon pou vin dan sa bann meeting. Kot azanda pa mwan ki pou etabli. Me plito zot, zot ava etabli azanda, pou zot kapab demann nenport kestyon. Pou zot kapab Fer okenn propozisyon, lo ki mannyer nou pou fer nou pei avans devan.
Alors mon donn zot randevou dan tou bann distrik apartir Pak sa lannen, pou sa 26 meeting.
Mr Speaker mon anvi komanse par met Sesel an konteks. Nou’n ariv dan sa moman ki dan politik nou apel mid-term. Dan ankor en semenn i pou egzakteman lanmwatye sa manda ki Lepep Seselwa ti donn tou bann politisyen ki la, ki dan lasal ensidswit, ti donn nou sa manda 5an.
Alors an Oktob 2020 Wavel, John, Charles Ramkalawan avek Ahmed Afif ti ganny elekte avek anviron 55poursan vot. Ti napa en koudeta, ti napa vyolans, ti napa presyon pou lo personn pou vot dan okenn direksyon. Me sa ti ganny fer atraver en vot lib. Dimoun ti desann, ti fer bann gran laliny e zot ti vote. E zot ti vote pou zot pou premye fwa dan listwar nou pei, pou elekte en dimoun pou rantre State House.
I pa ni ti vin atraver nominasyon, i pa ni ti vin atraver pas baton. Me pou premye fwa en Seselwa ti ganny elekte. E pou premye fwa i ti rantre dan Gouvernman koman son Prezidan.
Me lo lot kote, Lepep Seselwa, sa menm pep Seselwa ti osi swazir pou donn 2 parti politik en manda dan sa Lasanble. Zot ti donn LDS en mazorite absoli. Plis ki 2 tyer mazorite. E lo lot kote zot ti deside pou ki US i vin lopozisyon.
E Mr Speaker tenm nou konpanny sete ‘Sesel pou tou son zanfan’. Sete sa ki Lepep Seselwa ti vote, pou ki Sesel i sorti dan en landrwa kot - i sorti koman en pei kot keksoz i ganny fer dan nenport ki fason e ki ou ganny regarde dapre ou lapartenans politik, me ki Sesel i vin vreman pou tou son zanfan.
E Mr Speaker mon mazinen ki avek en mazorite parey, en politisyen ti ava kapab al dan nenport direksyon. Parski ou annan pouvwar absoli. E sete sa enn bann konsern ki plizyer dimoun ti adrese.
Me Mr Speaker, mon'n reste fidel avek sa tenm ‘Sesel pou tou son zanfan’. Mon'n reste fidel akoz mon en demokrat. Akoz mon lwayal anver mon pei. E akoz letan mon donn en parol, mon gard sa parol koman en parol sakre. Se pou sa rezon, ki mon pa'n al dan okenn direksyon, eksepte pou kontinyen proklanmen ki Sesel i pou tou son zanfan. Nou en demokrasi kot laliberte pou kontinyen renye.
Kot dimoun pou eksprim li libreman. E kot an menm tan nou ava kapab fer avanse nou pei. Nou ava kapab donn nou zanfan en zoli lespwar pou demen.
E Mr Speaker ozordi ankor enn fwa, mon anvi - letan nou pe komans sa nouvo lannen - e zot pe komans zot nouvo sesyon Lasanble, mon anvi ankor enn fwa dir ki mon pou kontinyen met lanfaz lo Rekonsilyasyon Nasyonal. Lo rekonnet sak Seselwa pou son abilite. Lo baz merit mon pou kontinyen proklanm fairness e lazistis. E an plis ki sa, sa pei ki apel Sesel anba mon Ladministrasyon, i pou kontinyen reste en pei ki ganny gouvernen anba sa prensip ‘the rule of law!’
E se la kot mon anvi dir ek Lepep Seselwa, deswit - mon anvi dir ek Lepep Seselwa ki letan zot elekte mwan, zot pa’n elekte mwan pou vin Komisyoner Lapolis. Zot pa’n elekte mwan pou vin Sef Ziz oubyen en Ziz.
Zot pa’n elekte mwan pou mwan vin Prezidan Lakourdapel. Zot pa'n elekte mwan pou vin Komisyoner Prizon.
Sa bann responsabilite pa mwan ki fer sa - pa mwan ki desarze. Mwan mon Prezidan Sesel e alor koman zot Sef Deta, mon pou sofgard zot laliberte. Mon pou sofgard laliberte sak endividi e sak dimoun ki lo nou later Seselwa.
E kot mon ete, mon pou fer monte paviyon Sesel pli o posib.
Mr Speaker mon pou kontinyen ekout Lepep Seselwa. Mon pou kontinyen pran desizyon, malgre ki serten desizyon pou dir. E mon pou kontinyen donn tou mon lenerzi, pou devlopman sa pei ki apel Sesel. Malgre, malgre tou bann mansonz, tou bann lensilt, tou bann lengratitid e bann latitid negativ bann ki anvi vin o pouvwar.
Mon pou toultan respekte lavolonte lepep. E kan in ariv son moman si lepep in fatige avek mwan Mr Speaker, krwar mwan pa ni pou bezwen rod en marto gro may pou kas sa lasenn ki mon pou'n atas mwan avek State House, akoz mon pou sorti volonterman.
Alor Mr Speaker pandan ki mon pe promot Rekonsilyasyon Nasyonal ek Linite - e i enportan pou Lepep Seselwa konnen sa - anmezir ki nou pe al lo sa larout, mon bezwen dir avek Lepep Seselwa ki mon konn en kantite plan pou retir nou lo sa semen.
Sabotaz lo landfill; sabotaz dan Stasyon Elektrisyen Perseverance ki ti’n kapab koz lanmor bokou pasyan kot Family Hospital. Lesey pou detri Stasyon Petrol Grand Anse Mahe. Lesey ki ankor pe pase ozordi pou enport zarm atraver Mombasa, Kenya pour serten progranm isi Sesel, malgre bann i dan prizon.
E bann miting sekre ki bann ansyen militer pe fer, akoz dapre zot, zot anvi fer Sesel pete. E bann move lartik malisye, mansonz, ki pe kontinyen met Sesel dan en move lalimyer. Mr Speaker, mon anvi dir avek Lepep Seselwa, ki nou konnen e mon konnen.
E konsey ki mon kapab donnen annou silvouple pa rod fer sabotaz kont nou zoli pei. Me annou plito rezet sa bann move lentansyon e annou viv dan lape e dan larmoni.
Mr Speaker mon demande ki nou fer politik ki prop. Mon demande ki nou adres bann size, ki konsern sa pei e ki nou pa zanmen, zanmen retourn dan sa bann lannen ‘77 an montan, ki ozordi nou annan nou en Komisyon ki pe fer en travay.
E la mon anvi dir avek ou Mr Speaker, ki le 28 Mars sa mwan, sa Komisyon pour prezant avek mwan zot rapor final. E deswit apre sa, parey Lalwa i demande, mon pour prezant sa rapor avek Lasanble Nasyonal. E i pou vin en dokiman piblik, pour ki tou dimoun i ava konnen kwa ki dan sa rapor, kwa ki zot pe rekomande. E atraver sa Lasanble Nasyonal i ava ed L'Egzekitiv pour konnen dan ki direksyon nou pou ale.
E Mr Speaker zis an pasan, letan mon pe koz lo annou fer politik prop, mon anvi dir avek ou ki nou kontinyen vwar en pe bann politik en kalite en mannyer. Parske ozordi dan State House, nou ankor pe tir bann bugs ki ti ganny mete par en ansyen Prezidan, letan en lot ansyen Prezidan ti vin o pouvwar.
Alors mon anvi dir, annou bouze - annou sorti lo sa lespri pour nou detri nou pei. I annan zis en Sesel e i annan zis en Nasyon Seselwa, annou gard sa larmoni, e annou reste touzour fidel anver preanbil nou Konstitisyon.
Mr Speaker 2020, ziska la ozordi i bann lannen difisil. Ki nou'n fer pour nou zoli pei Sesel? Nou'n travay dir, koman en Gouvernman, e ankor enn fwa nou'n fer sa pei respire.
Nou'n sitan fer li respire, ki serten dimoun in menm bliye, ki savedir COVID.
Serten dimoun in menm bliye, ki mannyer nou lekonomi ti'n ganny bate, e ki mannyer sa bann lannen, sete bann lannen dir. Ozordi, nou pep pe reklanm sa ki zot konsider koman zot drwa. E sa i osi enkli lasistans finansyel.
Nou'n bliye, ki poudir bann lannen 2020, 2021, 2022 ti en privilez pour ou ganny en lapey. E ozordi letan nou per koz, en bonous baze lo performans, serten i dir sa i en drwa! Serten i dir, ki menm bann ki pa travay i bezwen ganny rekonpanse.
E mon alor koman Sef Deta mon demande, eski vreman nou serye letan nou dir, menm dimoun ki pa travay, ki pa delivre i devret ganny menm rekonpans, parey sa bann ki travay.
E sa i fer mwan poz en kestyon;- Eski sa bann dimoun ki pe fer sa bann tel deklarasyon, zot annan okenn lide lo ki mannyer ou diriz en pei? Lepep Seselwa ki pou reponn sa.
Mr Speaker sa i anmenn mwan direkteman lo sa size travay dir dan nou pei. Mr Speaker Seselwa i fristre, mwan mon fristre. E mon sir ki mazorite nou ki la dan sa lasal nou fristre. Wi fristrasyon in rantre lo nou pei. E i responsabilite sakenn antre nou pour nou elimin li.
Akoz sa fristrasyon, nou bezwen demann nou? Eski se parski pep Seselwa ti anvi, oubyen ti ekspekte en gro bout lor pour sorti dan lesyel ranpli avek dyanman lo li, tonm devan son laport?
Eski Seselwa ti anvi en bout lesyel, e alor 2an edmi i pa ankor ganny sa bout lesyel, alor i fristre?
Non Mr Speaker! Fristrasyon i ganny trouve dan bann ptipti keksoz. Se sa ki fer nou pep fristre! Se sa ki fer mwan koman Sef Deta fristre!
En call ki pa ganny reponn; en larepons ki'n ganny promet dan en semenn, ki ou pa gannyen 3 mwan, 6 mwan pli tar. En pasyan ki pa ganny lenformasyon ki i bezwen; sa dimoun ki'n apply pour en travay e pa ganny en larepons.
En solisyon senp, ki pran 6 mwan, 1an e plis pour ganny donnen. En leksplikasyon, senp parey a, b, c ki pa ganny donnen.
Mr Speaker, se sa ki fer nou pep fristre. Se sa ki fer nou pep ankoler. E letan sa bann keksoz pa arive, se Gouvernman ki ganny blanmen. E byensir i annan bokou dimoun ki ede, pour fer sa fristrasyon. Zot, zot met bennzin, zot, zot met lasizani, e zot selman an menm tan zot pe ede pour anmenn sa bann fristrasyon.
Mon dir aret annou fer nou pep fristre! Annou aret fer nou pep viv dan sa fristrasyon, e dan sa lakoler! E tou dimoun ki annan en responsabilite, silvouple pran zot responsabilite!
Alor eski nou kapab rezourd sa bann fristrasyon? Wi nou kapab. ‘’Sesel pour tou son zanfan’’ i bezwen ganny pran o serye. Akoz si non, wi si non, i annan bokou Seselwa ki pour perdi zot plas travay. Zot pour perdi zot plas travay premyerman dan Gouvernman, e dezyenmman zot pour osi perdi zot plas travay dan bokou biznes, ki trouv zot avek sa menm latitid.
Letan mon dir sa eski nou konpran? E mon ti ava kontan ki pep Seselwa i konpran, akoz ki sa Ladministrasyon pe met lanfaz lo performans. Nou pe met lanfaz lo performans pour en senp rezon, pou dir avek ou si ou en resepsyonnis ou bezwen konn dir bonzour!
Si ou en dimoun ki reponn telefonn, ou bezwen reponn sa telefonn. Si ou en dimoun ki pli o dan ou landrwa travay, ki annan responsabilite pour ou pran en desizyon e pour ou donn en dimoun en larepons, ou bezwen donn sa dimoun en larepons!
Si en Minis i annan responsabilite pour li fer, i bezwen desarz sa responsabilite. E se pour sa rezon, ki nou pe met lanfaz lo performans. Pour nou dir avek tou dimoun, nou annan en responsabilite dan sa pei, pour nou kapab ed nou pep e ki sa lapey ki nou gannyen lafen dimwan, i pa devret parey ki serten i le fer nou krwar, menm si ou pa travay ou devret gannyen.
Alor mon dir ankor, Sesel pour tou son zanfan, i vedir ki tou zanfan Seselwa i bezwen travay! Tou zanfan Seselwa i bezwen donn sa ki meyer anndan li! Tou zanfan Seselwa i bezwen pran son pei aker.
E la Mr Speaker mon anvi dir i annan 3 kategori travayer ki nou bezwen adrese e ki pe fer Seselwa fristre ozordi. Premyerman i annan en group travayer ki li akoz son parti politik pa'n ganny Eleksyon, i a pe kit son lipye lo fren. Li i trouv sa koman son responsabilite pour li boycott travay Gouvernman! Selman lafen di-mwan, i anvi ganny en lapey avek sa menm Gouvernman, ki i pe boycott! Sa i premye kategori.
Dezyenm kategori se i annan en group dimoun ki krwar akoz zot pozisyon, zot la pour zot pini Lepep Seselwa. Zot la pour zot pini ou, malgre ki ou devret ganny sa servis, senpleman akoz petet ou annan en problenm ek son fanmir. Akoz petet in deza pas en lensidan avek ou, alors zot pini ou.
E trwazyenmman e nou bezwen aksepte - trwazyenmman i annan en group travayer ki senpleman pares ozordi dan civil service. Zot pares e zot pa pe delivre! Alor Lepep Seselwa sa i Leta nou Nasyon. E mwan koman zot Sef Deta, mon bezwen rod fason pour adres sa bann size. E se pour sa rezon ankor enn fwa, parey mon’n deza fer isi dan sa Lasanble Nasyonal, monn dir mon raise the alarm.
Pa bezwen reklanm viktimizasyon, oubyen vin devan Lorloz. Me plito rod ou latitid anver travay e blanm ou lekor, si i ariv bann desizyon parey, ki nou bezwen pran. Ankor enn fwa Mr Speaker, mon anvi dir - parey mon’n dir, pli boner lo serten keksoz ki pe arive - mon anvi dir klerman, i arive sa bann leko, tou sa bann leko partou kote, i arive dan mon zorey.
Leko bann travayer, sorti Val de Prés, Minister Later ek Housing, dan Minister Lasante, kot i donn lasistans sosyal. E dan bokou bann lezot landrwa, mon gannyen leko. Bann parol ki ganny dir e sa bann parol se pa bann zoli parol.
Alors Mr Speaker, koman sa enn ki responsab pour Ladministrasyon Piblik, mon pour pran mon responsabilite! Mon pour pran aksyon ki neseser.
E mon dir avek tou travayer, si nou leve bomaten pour nou vin travay annou silvouple delivre! Annou ed sa pep, me annou pa anmenn fristrasyon avek sa pep. E ankor enn fwa, mon pe lans en lenvitasyon tre kler. Si ou santi ki poudir ou pa la pour ou travay dan sa Ladministrasyon, ou lib, personn pa pour bat ou. Sesel bann zafer, viktimiz dimoun, bat dimoun ensidswit, nepli annan sa. Ou senpleman donn ou let e ou al fer keksoz ki ou pou kontan.
Alors Mr Speaker, parfwa an menm tan mon demande konbyen L’Egzekitiv i annan dan sa pei? Parfwa nou koman Cabinet - e la mon anvi partaz sa avek zot - koman Cabinet parfwa Minis i dir “be enn ler mon le krwar par mwan ki Minis, akoz mon donn en direktiv pour ed en dimoun, mon donn en direktiv lo ki mannyer pour rezourd en sityasyon, sa civil servant par anba i pa fer son travay!’’
E letan Minis apre ki in ganny en konplent, oubyen en let in vin kot mwan, oubyen en dimoun in koz avek mwan, letan Minis i al demann kestyon, zot dir ‘’be Minis sa lontan in pare sa!’’
Be si lontan in pare akoz ou pa'n call sa dimoun, silvouple? Si lontan sa rapor in pare, akoz ou pa'n anmas telefonn pour ou dir sa dimoun, vin sers ou rapor. Akoz ki fodre Minis ki vini, e apre pour ou bouze?
Alor ankor enn fwa Mr Speaker, mon krwar ki nou bezwen eple sa bann parol. Petet pandan sa premye 2an edmi, serten dimoun in dir mwan sa – in dir mwan “ou tro soft.” - Prezan mon pe dir be wi mon en, mon pe sey fer dimoun - ou konnen i en nouvo, i annan en tranzisyon ki pe pase.
Me selman, la mon krwar poudir ki tranzisyon in fini, tranzisyon in fini e dezormen, nou bezwen delivre. E alor mon anvi dir avek tou travayer dan Ladministrasyon, ki poudir i annan zis en L’Egzekitiv. E sa L’Egzekitiv se mwan ki diriz li, Vis-Prezidan se Msye Afif e sa Cabinet - nou ki diriz sa L'Egzekitiv. E apre sa, tou bann diferan dimoun i annan zot bann diferan responsabilite. Alors annou pran desizyon, ki bon e annou tir nou pep dan fristrasyon!
Annou adopte en nouvo latitid, kot nou vin dan sa Ladministrasyon, dan Gouvernman, e dan nenport lenstitisyon kot nou travay, annou vin bann dimoun ki rod solisyon pour problenm nou pep. Bann dimoun, ki ofer en fason pour ed nou pep avans devan. Annou pa les zis non, vin en larepons, me annou plito dir avek sa dimoun, ‘’non, me selman si ou fer keksoz dan tel fason, sa non i kapab vin en "wi.’’
Annou letan en zenn i apros nou, annou donn li en konsey, ki pou ed li grandi. Letan en dimoun pe rod en plas travay, annou ed li pour nou si fodre dir avek li, be mon frer, mon ser, mon krwar ki ou devret al etidye enn pti git plis ankor. Oubyen ki ou devret petet olye apply pour sa travay, apply pour enn ki pli ba.
Annou rod solisyon e non pa trenn lipye. Alor annou a tou moman e se sa Ladministrasyon ki mwan mon ti a voudre pour Sesel. Mon ti ava kontan en servis civil, kot dimoun i vwar en semen devan; kot dimoun i trouve, ki poudir mon problenm, mon issue ki mon’n met devan, i pe ganny adrese e ki sa travayer Gouvernman i pour sey fer en fason pour li donn en larepons pli vit ki i kapab.
E non pa anvoy demen, anvoy apre demen, anvoy mwan prosen e finalman i dir avek ou dokiman in perdi. Annou pa zis, rod survey. Ozordi Sesel ou a krwar tro bokou dimoun i krwar ki poudir nenport problenm ki dimoun i annan fodre ou fer survey avan, fodre ou fer konsiltasyon isi, fodre ou fer laba, tou sa bann keksoz. Kan souvandfwa larepons i a pe regard nou dan nou lizye.
Be annou sey regard sa larepons, nou osi. E annou pran sa larepons e annan ou donn sa dimoun. Olye zis fer keksoz -. Ou bezwen en glob - ou bezwen en survey pour ou sanz en glob? Ou bezwen en survey pour ou koup zerb kot en housing estate?
Pour ou fer en phone call, fodre ou fer en konsiltasyon avan? Pou ou swiv bann regilasyon ki an plas, eski ou bezwen fer en referendum? Pour ou letan en sitwayen i vin kot ou, pou fer en aplikasyon, ki si sa ki anpes ou pour ou demann li tou son bann dokiman? Pour ou pas dan lalis pour ou dir avek li i bezwen en a, b, c, d, e.
Akoz ou dir avek li anmenn ‘a’, apre semenn prosenn ou dir avek li, zot be ou konnen ou mank ‘b.’ Trwa semenn pli tar dir avek li anmenn ‘c’, en mwan pli tar oubyen de mwan pli tar letan i pe rod son larepons i dir avek li ou konnen ‘d’ in manke?
Silvouple, silvouple e mon krwar Lepep Seselwa i konpran egzakteman ki mon pe dir. Annou aret zwe avek sa pep Seselwa! Annou pran sa pep serye e annou tir sa fristrasyon ki dan nou pep ozordi. E mwan, mon donn zot mon langazman ki poudir, mon pour komans par mwan menm!
Mr Speaker, si tou travayer i konpran son rol e i angaz li pour li donn sa ki meyer anndan li, sa pei pour ganny transformen. Toulezour mon dir avek mon Cabinet, mon dir ek zot mon pa zanmen kit mon biro san ki mon pa'n fini avek tou bann dosye.
Mon pa kit biro avan ki mon pa'n fini dil ek tou bann dosye. E zot konnen, zot bann Minis, akoz bann let ki piblik i ekrir mwan. E la piblik i konnen ki poudir tou let ki zot ekrir mwan, zot ganny en phone call pou dir avek zot egzakteman kwa ki'n arive.
Me mon anvi Mr Speaker, dir avek sa pep, wi, mon partaz sa ki zot pe pas ladan. Sesel pou tou son zanfan, nou bezwen nou osi tou pran nou responsabilite.
E la mon anvi felisit tou bann travayer ki pe travay dan en fason konsyansye. Frer ek ser, i annan en kantite ki pe donn tou pou fer sa pei avanse!
Mon anvi felisit zot. I gou travay avek zot. E mon konnen ki poudir bann Manm Lasanble zot menm zot, i gou letan zot pe travay avek bann tel dimoun akoz keksoz i bouze! proze dan zot distrik i bouze! Solisyon i ganny trouve. E letan dimoun i zwenn zot, i dir avek zot, mersi bokou. Alors pou tou bann travayer ki pe travay dir pou fer sa pei marse, mon dir avek zot, felisitasyon.
Me Mr Speaker, mon anvi osi dir avek nou pep, silvouple, annou aret rod zis Gouvernman. Annou sanz sa mindset, e annou pran nou responsabilite. E Gouvernman li osi tou i ava akonpanny zot. Mon a donn zot en legzanp - de legzanp senp;
En dimoun i al vol koko, i vann ek touris sepa konbyen, e apre i kit tou son salte lo lans Anse Lazio. En msye i vini i fer en video. Ki son kestyon ki i demande? Oli LWMA? Oli Lanvironnman? Mon mazinen i ti devret al rod sa boug ki'n zet salte lo lans, me non i pe rod Gouvernman.
En dimoun i sant en sanson, dan ki i dir ‘’Sesel i dan mal. I annan bann zenn zanfan anba laz pe regard bann show adilt, e i annan en kantite bann aksyon endesan.’’ Son kestyon, oli travayer sosyal, e kwa ki Gouvernman pe fer? I pa demande, oli paran sa zanfan? Zot konpran mwan?
Annou rod dimoun ki premyerman responsab pou en keksoz. Annou rod paran sa zanfan! Annou rod sa dimoun ki pe sali sa lans. Annou pa zis rod, oli Gouvernman? Wey, zot koze zot dir isi, zot dir laba!
E se la Mr Speaker kot mon anvi vin lo sa dezyenm tenm.
Ou konnen Sesel in annan en nouvo laliberte lekspresyon. Tou dimoun ozordi i koze. Sesel ozordi, tou dimoun i en eksper. Tou dimoun i konnen. Mwan osi tou parfwa mon ganny akize konmkwa mon konn tou! Be mon bezwen dan en pozisyon kot mon bezwen sey konn tou, akoz mon ki pe diriz sa pei. Mon bezwen sey konpran tou keksoz.
Alors Mr Speaker, sa nouvo laliberte i fer ki dimoun avan ki zot met sa don ki Bondye in donn nou, sa kado ki Bondye in donn nou ant nou de zorey ki apel nou lespri. Avan zot met li dan gear, zot met ledwa lo keyboard. Avan zot met sa lespri dan gear, zot koze.
Alor mwan mon anvi dir avek Seselwa, annan rod en nouvo kiltir. En kiltir kot nou ekoute, kot nou analize, kot nou fer refleksyon avek bann petet ki konn plis ki nou. E apre sa, annou donn nou lopinyon. Eski i pou tro bokou pou mwan dir avek sa bann Facebook aktivis, pou mwan dir avek zot, pibliy laverite silvouple? Rod klarifikasyon pou sa bann keksoz ki zot pe al ekrir.
Lotrozour i annan en madanm in fer en audio tape. Mon ti pe demande, be sa madanm konmsi ti dan sa avyon Aeroflot li? Parski avan pasaze i debarke, li in fini fer sa audio tape. In dir egzakteman ki'n arive dan sa avyon.
Eski i pou tro bokou pou nou dir avek bann dimoun ki annan en pe plis konesans, pou vin devan pou ed nou pep sorti dan sa fernwar, avan ki nenport kwa i ganny pibliye?
E la mon anvi dir avek Lasanble Nasyonal. E mon anvi dir avek Lepep Seselwa, e mon zwenn avek Lasanble Nasyonal - parski mon konnen ki pou dir Lasanble in koz souvan lo sa bann lensilt ek harassment ki pase lo Facebook, ki poudir mon’n deza koz avek Komisyoner Lapolis, pou fer sir ki anbaCybercrimes and Other Related Crimes Act, 2021, ki Lasanble Nasyonal ti pase li menm, pou zot pran aksyon kont bann dimoun ki servi Facebook zis pou ensilte son prosen, zis pou maltret dimoun!
Sa lapolis pou konmans fer. E alor, mon pe dir avek bann dimoun ki pe rantre dan sa bann aktivite, silvouple arete, akoz zot pou dan problenm. E letan zot tonm dan problenm, pa bezwen sot anler e dir, ‘’laliberte lekspresyon pe ganny koupe dan sa pei!’’
Eski i tro bokou pou mwan demann bann zournalis pou zot raport laverite? Eski i tro bokou pou mwan demann bann zournalis, pou zot pa zis reste lo sa ki sansasyonnel? Me pou zot osi ed nou pep pou konn laverite. Ed nou pep pou zot grandi. Raport lo sa ki vreman pe arive dan pei, e non pa lo zis sa ki sansasyonnel.
Alor mon ankouraz tou bann zournalis, pou zotaprofondi zot konnesans toulezour. E pa bezwen krwar ki poudir overnight zot pou vin en Richard Quest oubyen en Christiane Amanpour. Wi, servi sa bann dimoun koman zot model, me pran zot letan. Pran zot letan, devlope, e atraver sa, nou ava kapab ganny en pep ki vreman edifye.
Mr Speaker, mwan avek Ladministrasyon, nou fyer pou bann lakonplisman ki nou’n kapab fer pandan sa de dernyen lannen. Nou'n bouz sa pei dan en fason enorm depi kot nou ti vin zwenn li. E la ankor enn fwa letan mon mazin tou bann dimoun ki'n travay dir, mon anvi dir ki mon vreman fyer.
E mon anvi osi an menm tan, petet, ed nou pep pou zot konpran en pti git dan sa demokrasi ki nou pe koz lo la, ki poudir gouvernans en pei, i pa ki ou ganny 5an, e apre sa letan ou fini ou 5an, ou anmas tou sa ki ou'n fer ou al avek. I annan en kontinite.
E alor letan mon tann bann politisyen, sipoze bann politisyen mir pe dir ‘La i la, Gouvernman ki la zis pe koup riban bann proze ki'n…!’’
Ar wi, - wi, parey ki apre mwan, pou annan en lot dimoun ki pou vini ki pou koup riban bann proze ki mwan mon pou'n komanse.
I annan en kontinite dan Gouvernman. Sanzman en Ladministrasyon i vedir ou osi erit sa ki sa Ladministrasyon avan in fer. E,nou kapab nek zis pran legzanp bann det ki Ladministrasyon avan in kite. Letan nou'n vini nou'n bezwen pey Mr Alain St Ange R7milyon. Nou'n bezwen pey en lot 3milyon - Mr Hoareau St Louis. Nou'n bezwen pey en lot 2milyon - Mrs Monthy anler Bel Eau.
Nou’n bezwen pe pey pou bann lakizisyon later ki bann parti avan ki ti la pandan 43an zot in fer. Eski alor Ladministrasyon? Nou devret dir ‘’non, non, non, non, non, non, non. Mr St Ange sorry, al kot Ladministrasyon avan.’’ Non, i annan sa kontinite.
Me an menm tan osi, parey nou pe dir, tou sa bann proze, annou regarde. Serten bann proze ki ozordi mon fyer ki sa Ladministrasyon in nobou trouv larzan, oubyen trouv bann mwayen pou fer zot arive. National Library; Apre 5an kot Sesel in napa en National Library, sa lannen, nou bann zenn pou kapab ankor enn fwa rantre dan National Library. Carnegie, ki pandan plis ki 2an avan nou vin dan Ladministrasyon, ti'n fermen, pe fini li osi. Sa zoli batiman kreol, Lenstiti Kreol, ki tou dimoun i pase i dir zot be ki pe arive laba? Wi, parski Ladministrasyon avan ti'n fini walk out. Sa osi tou i pou reganny son labote, e i ava vin en latraksyon touristik pou distrik Au Cap.
NIHSS, nou'n fini refer. En batiman ki ziska ozordi, menm si in fini refer - e nou bann etidyan i ladan, i annan serten pe dir pou grennen. Mon pe esper li grennen.
Lekol Belonie, ki ankor enn fwa ti'n fini vin lo pause akoz ti napa larzan. Nou'n nobou, atraver bon travay Minis Hassan avek son lekip, ek Gouvernman an antye, nou'n nobou trouv larzan pou fer li fini. E wi, tre byento, ansanm avek Onorab Sathya Naidu, nou pou koup en riban pou nou kapab, pou nou mark son linogirasyon.
Byento Seselwa ankor enn fwa pou kapab zwe foutbol isi, e regard foutbol bann match enternasyonal. E an menm tan osi nou bann zanfan, mon espere ki pou dir byento la, nou bann zanfan, zot ava kapab tay lo en tartan track ki nef, e nou pa ava ganny bann konplent.
E letan ou pe regard tou sa bann lezot fasilite sportif, tel ki Palais des Sports, ki pandan plis ki 3an ti'n annan en gro trou ladan, e ki la ozordi, tousala in fini renouvle.
Mr Speaker, nou'n konplet nouvo terminal ERO lo Praslin, ki ti sipoze anba Ladministrasyon avan, komanse dan lannen 2024 mon krwar - si mon pa tronpe. E tou dimoun i happy.
Bazar Baie Ste Anne byento pou ouver, ansanm avek en nouvo port lapes. Gear store pou bann peser Grand Anse Praslin, byento pou ankor enn fwa pare. E la mon deza envit, mon envit tou Seselwa pou louvertir Lopital La Digue, pli tar sa lannen. Enkli tou bann ki ti boycott li.
Mon osi anvi envit tou Seselwa byento, la nou pou ouver nouvo cargo terminal lo por La Digue. E parmi bann stasyon lapolis, e ki zot ti anvi kraze zete, nou'n fini renouvle Kordgard Baie Lazare. E la byento Anse Etoile, Glacis. Glacis mon krwar nanm in fini taye, in sove. Nou pou re ouver Kordgard Glacis. Nouvo Kordgard Baie Ste Anne Praslin, e Kordgard La Digue li osi tou in fini renouvle. En nouvo lekol La Digue; - En promes ki bann Digwa in gannyen pou plis ki 15an, nou'n fini kapab ganny finansman. E byento la lekol La Digue primer e segonder pou vin komanse, e byensir nou pou envit Onorab La Digue pou vin koup riban li osi.
E an plis ki sa Mr Speaker, pou annan bokou plis bann housing projects ki'n deza demare. E pou annan plis ankor ki pe demare. E la mon anvi dir ki funding pou lekol Belonie, pou lekol La Digue, e osi serten bann housing projects i vin atraver Saudi Arabia. Dan menm fason ki housing project Barbarons, kot nou ekspekte ganny 80 unit. Sa i ganny finanse par Gouvernman UAE.
En nouvo sports arena Anse Royale. Ankor enn fwa UAE avek tartan track lo Stad Linite. En sant reabilitasyon pou drog. Nouvo sant IECD; semen West Coast ki deza pe konstrir, sorti Anse à la Mouche ziska Baie Lazare. Tousala…E dan lopital, en nouvo MRI, bann latest model - nou'n fini ganny finansman, an menm tan osi, finansman pou cardiologue, e lopital, manager lopital. Tousala se bann kado ki nou’n kapab gannyen. Parfwa zot demande ki mon al fer deor letan mon al vizite. Wi, mon parey en bon peser, ki letan mon al deor, mon al lapes. Letan mon retournen, bato i plen. Alor, kontinyen ankouraz mwan.
Mr Speaker, nou'n war ki pou dir nou'n komans fer en kantite travay Anse Boileau. Kot in toultan annan flooding, la ozordi, napa flooding. Anse Aux Pins, Au Cap, Anse Royale, nou'n kapab fer bokou travay. E la Mr Speaker, zis dan sa rezyon sid, letan nou'n fer desilting bann larivyer ki ti enn bann lakoz prensipal, nou'n retir 16mil755 tonn siltedan sa bann landrwa.
E zis dan Victoria, nou'n tir plis ki 2mil tonn, 2mil tonn silt. E mon mazinen ki pou dir nou pa'n kapab met tousala dan sa peryod 2an.
Alors zis pou mwan dir avek zot ki mannyer letan Gouvernman Ladministrasyon i sanze, nou gannyen tou sa bann responsabilite. E bann keksoz ki pa'n ganny fer par sa enn avan, se lot ki bezwen fer.
E la mon anvi osi anonse ki Victoria Hospital casualty, maternite, theatre, byento nou pe al fini komans renovasyon. Nouvo klinik Baie Lazare, tousala ti'n ganny anonse. E nou serye lo nou bann progranm. Me an plis ki sa, si tou keksoz i mars byen, nou annan lentansyon, e nou pe fer bann plan pou nou kapab konstrir en nouvo Lopital Sesel ki ava ranplas sa lopital ki nou annan ozordi Mont Fleuri. E …
E la Mr Speaker, byento, Family Hospital osi pou ankor enn fwa resevwar bann dimoun pou bann pti loperasyon. E nou ava mazinen ki pandan peryod COVID, sete laba ki ti ganny servi koman ICU pou bann pasyan. E an menm tan osi lift Victoria, zot pe fini - zot pe byento komanse pou nou kapab repar zot.
Mr Speaker, lo lot kote nou a pe ouver nou pei, pou nouvo lenvestiser lokal e osi etranze. Proze Kato Nwar lo Praslin pou war en marina multi storey carpark ek bann batiman komersyal, ki pou ganny konstrir.
Iles Eve, tender in fini, e nou'n fini pas tou bann lenstalasyon neseser e bann tender in fini - bann dimoun in fini gannyen zot tender. E nou ekspekte ki poudir byento, ankor enn fwa keksoz i ava bouze.
Lo Grand Anse Praslin, kot ansyen STC, pe al annan bann latelye pou bann pti biznes. E an menm tan osi, nou pann bliy nou bann sportsmen pou nou azout en dojo pou nou bann judokas e karatekas. Mr Speaker, ler mon dir nou konsyan osi tou bezwen nou pep. E se pou sa rezon ki an se moman anba direksyon Minis Rangasamy, i annan bokou bann proze lakaz ki'n deza lanse. Corgat Estate in fini lanse. Union Vale nou pe al ver konplesyon. E bann lezot osi tou. Barbarons nou ava komanse, pou nou fer sir ki nou kapab donn nou bann dimoun lakaz ;- Bann ki'n lo lalis pou en kantite letan.
Me an menm tan osi, nou a pe donn later en kantite bann dimoun ki'n kalifye. E nou pe rod fason pou ki bann dimoun ki annan en pti bout later o bor zot, ki baliz avek zot, pou zot kapab ganny sa bann later. E sa i fer ki zot kapab fer zot lakour.
Alors tousala Mr Speaker, se bann keksoz ki nou a pe sey fer. E la, mon bezwen aksepte, e mon bezwen montre mon rekonesans, anver tou bann dimoun ki pandan sa bann lannen, sa de dernyen lannen, zot in vin devan, zot in fer bann don.
Nou'n war ki mannyer, si ozordi nou pe debout for, tou bann vaksen COVID nou'n ganny kado. Nou'n ganny de nouvo oxygen plant. Nou'n sorti lo enn letan nou ti rantre dan Ladministrasyon, ozordi i annan trwa oxygen plants, ki vedir problenm loksizenn in en keksoz lepase pou nou.
Nou'n ganny nouvo fridge pou met bann vaksen ladan. R78milyon roupi, dimoun in donnen, in fer kado, pou nou kapab fer fas avek bann sityasyon COVID. E Oditer Zeneral in dir apre ki in fer lodit, tou keksoz ti annord. Non pa parey FA4JR ki Oditer Zeneral i annan en lopinyon totalman diferan lo la. Pou tou bann dimoun ki'n donn nou lakomodasyon lotel, pou naryen, pandan … pou servi koman karantenn.
Lopital ki nou'n ganny kado. Sant Izolasyon ki nou'n konstri dan 17 zour. Nouvo mammogram pou nou bann madanm dan lopital. E la byento i annan en nouvo dimoun ankor ki'n pare pou donn en nouvo x-ray machine. Lifts nou'n ganny kado. Lanbilans pe rantre dan pei byento.
E Beau Vallon nou’n ganny kado sa nouvo la promenad kot regatta site. E pli tar sa lannen, non-selman ki Lepep Seselwa pou kapab enjoy en regatta. Me nou pou kapab osi komans war konstriksyon sa transformasyon Beau Vallon.
Mr Speaker mon pe dir tousala pou mwan dir avek nou pep Seselwa, ki pou dir sa Gouvernman pa dormi! Sa Gouvernman pe travay pou son pep! Sa manda ki zot in donn nou, i en manda ki nou pran li o serye.
E letan nou al lo lasenn enternasyonal, nou toultan strive pou nou donn Sesel sa meyer repitasyon posib. E tou dimoun ozordi i koz lo Sesel. E la se pou sa rezon ki letan mwan mon al dan sa bann konferans enternasyonal, toultan mon ganny demande pou mwan vin fer prezantasyon. Oubyen pou al partisip dan sa bann roundtable. E a tou moman mon fer sir ki mon fer paviyon Sesel mont pli o posib.
Se pou sa rezon Mr Speaker, avek sa travay ki nou pe fer isi lo Mo Ibrahim Index - nou dezyenm. Lo Transparency International, se nou ki ganny deklare koman pei ki mwen koronpi an Lafrik. Lo Media Freedom Index nou premye. E nou premye pei Afriken pou annan en passport biometrik.
E non-selman en passport biometrik, me an menm tan osi en passport ki son valer toulezour i monte. E avek travay ki nou pou kontinyen fer, mon pa pou reste etonnen si Sesel i vin premye pei Afriken, kot nou pa pou bezwen en visa pou nou antre Lanmerik.
Alor Mr Speaker, se sa bann keksoz ki nou pe fer. E la i annan en nouvo Index ki’n fek ganny pibliye lo la demokrasi, e Sesel i ganny konsidere koman the only Liberal Democracy dan Sid Sahara. Ankor enn fwa se bann keksoz ki fer nou fyer.
E dan SADC petet se pou sa rezon ki Mr Speaker ou ki’n ganny sa responsabilite pou oversee, sa transformasyon SADC-PF dan en SADC Parliament.
Mr Speaker, i annan bokou keksoz ankor pou nou fer. E la mon anvi dir, sa Ladministrasyonki la i regard son pep toulezour.
Mr Speaker in annan bokou labi;- in annan bokou labi al dan tou direksyon. E petet se pou sa rezon ki parfwa nou’n ganny regarde koman en Ladministrasyon ki pe met regilasyon. Pe met regilasyon pa pou nou pini nou pep, me pou ou kapab re ganny sa balans. E la mon bezwen dir nou’n re ganny en kantite balans. E travay ki nou pe fer - premyerman mon anvi dir ki ASP ansanm avek Minister Finans, zot in fer en travay ekstraordiner. E byento nou pou kapab - ankor enn fwa atraver travay dir ki sa pei in fer - nou pou kapab re donn nou nasyonankor enn fwa bann ki dan pli bezwen, en nouvo form - bann nouvo lasistans kot zot pou ganny en increment dan bokou bann lasistans.
E an mezir ki nou senplifye bann prosedir, alors dimoun ava kapab ganny en lasistans e ganny sa soulazman dan en fason bokou pli vit. Part rental ankor enn fwa nou’n regard nou pep ki pe travay pou zot kapab ganny zot prop demer. E part rental osi sa in increase. Nou’n kapab atraver rann avek sa pep larises ki ganny prodwi - nou pe al mwan prosen, donn en 10 poursan logmantasyon lo lapey sa civil service.
E in enteresan osi ki pou dir i annan serten ki dan sekter prive, zot in war sa koman en bon linisyativ e zot osi tou zot pe donn zot travayer en logmantasyon. E mon ti ava demande ki tou sekter prive, zot osi swiv sa.
Mr Speaker tou travayer, tou travayer sa lannen zot in ganny zot 13em mwan performance bonus. E apre tou sa bann konplent ki mon’n swiv isi dan sa Lasanble Nasyonal, mon krwar ki nou’n arete tann konplent. Tou bann travayer byen kontan bat lanmen, byen selebre. Sa i montre ki mannyer nou koman en Gouvernman, nou serye letan nou dir nou anvi rekonpans nou pep. E sa lannen komansman, kou elektrisite in desann, e laplipar fanmir zot in nobou trouv en rediksyon anviron R300 zot bil elektrisite.
E serten dimoun ki ganny lapey ba, zot pe kontinyen kapab ganny akse avek sa bann discount. E ankor enn fwa dan rezyon - parfwa nou konplent, nou konplent bokou Sesel. Me selman mon anvi dir ki pri fuel par egzanp lo laponp, apard Madagascar, Sesel i pli ba.
Letan ou a pe pey R20.60 sou en lit, La Reunion zot pe pey R26.20, Moris zot pe pey R23.27, Mayotte zot a pe pey R 27.41. E si nou al pli lwen Langleter zot pe pey R25.07 sou, Lafrans zot pe pey 30.13, Germany pe pey R27.72. Nou Sesel ki nou fer, letan nou kapab fer en lekonomi nou fer zis en keksoz - nou pas sa ki nou kapab ekonomize avek nou pep.
Alor sa Ladministrasyon pe fer tou pou son pep, pou kapab gard the cost of living pli ba posib. Me selman malerezman nou pa kapab lager kont sa ki pe arive dan lemonn.
Letan i annan en lager dan en pei, i annan en lenpak direk. Letan pri transportasyon i ogmante, nou pa kapab al lager kont sa, me nou plito sey regarde ki mannyer nou kapab mitigate sa.
Letan STC pe kontinyen fer tou sa ki i kapab e la i a pe built en nouvo cold storage - en nouvo cold store pou li kapab store bann manze lo sa tanperatir ki i bezwen, pou pli long letan pou ki letan i bon marse, nou ava kapab aste en kantite, store zot e nou ava kapab servi zot pou plis letan. Annou pa bliye ki pou dir ziska prezan, STC apre tou sa bann lannen depi ki SMB, pa’n zanmen arive sa, la ki nou pe al fer li.
E mon war pou dir i annan plis Seselwa ki enterese pou antre dan bann biznes, kot zot pou vin koman bann import substitution.
Alor Mr Speaker tousala se bann keksoz ki nou a pe sey fer pou nou pep. E mon anvi dir avek nou pep, pa toultan taye – ekoute, reflesir e analize, e zot ava war ki nou pe fer.
Mr Speaker, letan mon regard nou pei, mon kontan war ki ozordi nou annan bokou plis nou bann zenn lo bann laplenn, lo bann courts pe train. Letan mon pase parfwa apre ler travay, mon war tou sa bann landrwa i plen. Dan Dimans ankor enn fwa mon war bann zenn lo laplenn Gordon Square, alors mon anvi dir avek nou bann zenn annou kontinyen.
E la mon anvi felisit tou nou bann zenn ki ti partisip dan CJSOI, lafason ki zot in retourn avek plis meday. E non-selman nou bann zenn;- nou bann zenn ki napa okenn dezabilite. Me nou bann zenn avek dezabilite osi tou, zot in nobou retourn avek meday lor. E pou sa nou tir sapo avek zot e nou koman en Gouvernman, nou pou kontinyen apiy zot. E mon konnen ki pou dir Onorab Naddy, i enn ki pe travay for pou kas diskriminasyon, Onorab sa Ladministrasyon pou fer sir napa okenn diskriminasyon ni pou travay, ni pou nou bann zenn, ni pou nou bann dimoun ki annan bann lezot dezabilite.
E an menm tan letan mon pe regard nou bann zenn, mon anvi dir avek zot bann zenn. Mon fyer letan mon war sa bann bon rezilta ki zot gannyen.
Mon fyer letan mon war zot pe devlop bann bon latitid anver travay. Mon fyer letan mon war zot pe organiz plis bann aktivite kominoter, ki pa bezwen fini dan drog, lalkol bann aksyon endesan ek limoralite.
E la mon anvi fer en lapel spesyal osi avek nou bann artis. Mon anvi dir avek nou bann artis ek bann ki organiz sa bann shows - pep Seselwa pa’n apresye sa bann keksoz ki nou’n war tou dernyerman.
Kot pe fer bann zenn manrmay anba laz, mont lo stage dans demi touni. Pou fer sa bann show lo stad lanmizik, kot ankor enn fwa nou pe war en bann kalite ensinifyan e avek bokou bann zanfan.
Mwan mon zwen ansanm avek SIFCO pou dir nou bezwen al ver en nouvo moralite dan sa pei. E la mon ankouraz tou bann artis, parski zot annan en rol pou zot enfliyans nou bann zenn. Silvouple enfliyans nou bann zenn dan bon direksyon! Dan bann aktivite ki prop, dan bann aktivite kot dimoun i ava kapab al an fanmir. E non pa dan sa bann aktivite ki nou pe war ozordi.
Annou pa koronp lespri nou bann zenn, me plito annou donn zot responsabilite, pou ki zot a kapab devlop sa lespri lantreprenarya. E koumsa Sesel i ava kapab - non-selman servi sa pou nou menm devlop nou - me nou a kapab osi eksport nou konesans avek larezyon e osi pli lwen ki sa.
E la dan sa lespri ki Minis Hassan avek Minis Devika, zot in pran pou ou al ver sa monn nimerik – digitalization - kot nou pou kapab al dan ease of doing business, bann fasilite gouvernman ensidswit. E byento la zot pou atann serten lanons. Mon anvi dir avek nou bann zenn, nou anvi ki lorizon ki vin limit pou zot. Alors debourye e pei i ava la pou siport zot.
Mr Speaker, leta nou Nasyon i enn ki vreman enteresan. I annan kantite keksoz ki pe arive. E mwan mon enn ki krwar ki pou dir, ki tou fristrasyon dan nou pei i kapab ganny eliminen.
Mon krwar ki pou dir tou Seselwa i kapab ganny en bon plas travay e mon krwar ki Sesel i kapab vreman vin pou tou son zanfan. Me selman Mr Speaker mon anvi termin lo en not konsern. Mr Speaker, mon konsernen pou nou pei Sesel.
Mon kontan letan mon’n war SNYC pou premye fwa, fer bann zenn elekte zot bann Manm pou Youth Parliament. Sa i fantastik. Parski bann zenn, zot in kapab - zot pe deza komans konpran sa lide ou fer en promes e ou bezwen gard promes. Bann zenn pe konpran ki pou dir, pou en leadership role mon kapab vin devan mon bann kanmarad e ofer zot sa ki mwan mon annan pou fer.
E mon ti vreman enpresyonnen avek sa bann zenn, letan zot ti pe koze pou zot dir lo kwa zot in fer zot konpanny. Lo kwa bann issues ki zot war pou lazenes. Sa i donn mwan lespwar.
Me selman Mr Speaker drog in detri en gran parti en zenerasyon nou pei. E ozordi nou bezwen fer atansyon. Mon vreman konsernen letan mon regard sa kiltir lensilt, ki’n devlope e mon demann mwan parfwa ki kalite dirizan ki nou pei pou gannyen?
Si sa kiltir lensilt i kontinyen, eski dimoun pou pare pou zot pran bann responsabilite dan sa pei? Oubyen eski dimoun pou dir, ‘’eh, eh, mwan mon pa pou vin pran okenn responsabilite pou mwan ede diriz sa pei. Mon pou plito al dan mon pti biznes oubyen al travay dan sekter prive, oubyen rod en plas travay aletranze ki mon pa a bezwen ganny ensilte.’’
Mr Speaker nou bezwen kas sa. Nou bezwen rod en fason pou nou ankouraz bann bon dirizan. E se pou sa rezon ki i enportan, pou nou kapab ranvers sa kiltir lensilt!
Retir sa kiltir mank respe e met en kiltir ki valoriz dimoun. E sa i ava fer ki nou ava kapab al dan en bon direksyon.
Nou ava kapab ed dimoun, ed nou bann zenn pou pran larelev. Parski Mr Speaker, si nou pa al dan sa direksyon, mon konsernen ki pou dir lavenir nou pei i pou dan lanmen bann mersener.
Mersener ki parey nou konnen, i fer travay pou larzan, i vin aste ou e apre sa i fer sa ki li i anvi. Mr Speaker mon pa ti ava kontan war sa pei Sesel retourn dan en sityasyon kot lentere personnel, i pas avan lentere nasyonal.
Mon pa ti a kontan vwar nou pei retourn dan en sityasyon kot bann Minis i sir plis ki 60 kare later pou li.
Mon pa ti a kontan war Sesel retourn dan en sityasyon kot serten i resevwar gro lanvlop, pou bann faver;- kot zot fer kontrakter fer travay pou naryen pou zot an retour pou ganny bann lezot benefis.
Mr Speaker mon ti ava kontan war en Sesel kot lavenir nou bann zanfan i ganny pran o serye. Se sa ki’n pous mwan pandan tou sa bann lannen, pou mwan lager pou la demokrasi.
Mon ti’n kapab dan bokou lenstans, spesyalman dan sa dernyen Lasanble avan ki mon ganny elekte, nou ti’n kapab fer bokou ditor nou pei. Nou ti’n kapab servi tou keksoz politikman. E nou pa’n fer li akoz nou’n krwar dan nou’n pei Sesel.
E se pou sa rezon ki ozordi, letan mon dir nou pou kontinyen dans a lespri, Sesel pou tou son zanfan - mon anvi dir tou Seselwa, tanpi ou kiltir politik, tanpi ou kouler politik, me travay pou Sesel!
Bomaten ofet Mr Speaker, mon’n asiste premyer seremoni kot en group nouvo sitwayen bann dimoun ki’n ganny nasyonalite citizenship, zot in pret serman. E i annan de pti parol mon’n dir avek zot, mon pa ni konn laplipar zot. E mon pa’n ni enterese pou konn laplipar zot, akoz mon konnen ki pou dir prosedir in ganny fer dan en fason drwat, dan en fason above board parey nou dir.
Mr Speaker letan mon regard serten bann dimoun ki’n ganny nasyonalite dan lepase - e tou dernyerman la mon’n bezwen, mon’n war en file kot dimoun ti ganny nasyonalite pou lezot rezon.
Mr Speaker, nou bezwen travay serye e nou bezwen fer sir ki nou pei i lager kont sa fleo drog. Sa pti progranm lo BBC, ki’n pase, i donn nou - i donn serten dimoun en pti lapersi lo kwa ki pe pase dan nou pei. E mon anvi dir avek zot i annan bokou pli pir ki pase. Letan mwan mon tann en dimoun, en zenn madanm i dir ‘’I love my husband, I love my kids but I love my heroin! ‘’ Mon espere zot plere parey mwan.
Mr Speaker letan nou detri sa lannen la - e la mon felisit Brigadye Rosette, Komisyoner Lapolis e nou servis lentelizans, pou travay ki zot fer.Pli boner sa lannen letan mon ti anonse, ki pou dir nou’n detri anviron 1tonn drog, serten dimoun ti rode oli sa drog?
Mr Speaker, mon kapab reponn zot. Si zot al koule 3mil met profonder, zot ava war sa 1tonn drog ki nou’n detri.
Mr Speaker, letan nou pe koze la avan yer - dan lannwit avan yer, nou lafors militer in nobou diriz lafors naval Franse, kot en dav ti ete e Franse in nobou kapab detri dan rezyon en pe sid, in nobou detri 1065 kilos eroin, ki vedir 1tonn avek 65 kilo.
Lo airport malgre ki nou napa tou bann fasilite, me nou pe sey improve bann fasilite, nou pe sezi drog. Semenn pase nou’n sezi plis ki 500 granm drog cocaine e nou konnen ki poudir i annan ankor bann ki lo alert e ki nou pou sezi.
Pli nou sezi, pli nou fer bann aksyon, pli i resanble ki sa bann ki pe fer vini sa pwazon, zot annan lardyes. E la mon anvi - malgre mon pa anvi al dan case ki ankour - me selman mon anvi dir onnetman, enn bann meyer desizyon ki zot koman Lasanble zot in aprouve, Se sa lamannman konstitisyonnel ki’n donn militer avek Lapolis, sa posibilite pou zot travay ansanm kont sa lalit kont drog mon anvi ……felisit zot pou sa desizyon ki zot ti pran. E ozordi, ozordi nou pe kontinyen fer sa bann kalite travay.
Alor Mr Speaker sa drog i pe kontinyen afekte nou lazenes. Sa drog pe kontinyen detri nou pep. Mon demann zot bann Manm Lasanble, mon demann Lepep Seselwa pou ed Ladministrasyon lo kimannyer nou pou anmenn sa lalit ankor pli for!
Nou'n detri plis drog dan sa dernyen 2an - 2an edmi ki'n ganny detri pandan tou sa bann lannen ki drog pe anvair nou landrwa. Ki nou pou fer avek sa bann dimoun, sa bann trafikan, sa bann enportater? Ki nou konnen zot dan drog, ki zot reste Anse Possession, ki zot reste La Louise, ki zot reste Anse Aux Pins, ki zot reste dan tou bann kwen, nou konn zot, tou dimoun i konn zot. Me selman malerezman ou pa pou zanmen war drog avek zot! Silvouple Lepep Seselwa e la mon demann tou le 3 brans Gouvernman, ed nou, ed sa Nasyon pou nou kapab fer keksoz legalman me pou nou kapab met en lafen avek sa fleo!
Lakantite drog in diminyen, me selman i ankor la. Lotrozour avantyer la in annan en video ki tou dimoun in atriste, pou war en zenn fiy apre ki in servi eroin lo semen pe kick;-tou dimoun leker in lour. Alors mon kit dan zot lanmen pou nou regarde kimannyer nou pou kapab fer nou pei avanse.
Me selman Mr speaker letan mon pe dir tousala ek sa sityasyon drog, mon war nou ledikasyon pe ganny afekte. Mon war nou lot zenerasyon. Ozordi nou annan crack babies ki pe ne lopital, kot en manman ki pa'n al konsilte i vin maternite i ganny son pti baba, apre sa i ale i kot sa pov pti inosan lanmenm la.
Nou sistenm lasante pou kontinyen ganny afekte plis, parske ozordi nou annan drog, me nou osi annan lalkol ki pe pran bokou resours nou pei. Ofet sa 2 ansanm i pran plis ki 50 poursan, letan ou azout tou bann diferan maladi ki nou gannyen e apre sa nou konplent lasante. Petet la mon ti ava zis anvi dir avek zot ki, nou pou bezwen annan en ledikasyon pou nou dir ek nou bann dimoun ki savedir en casualty.
Zis dan mwan Zanvye casualty ki sipoze en emergency service in vwar plis ki 3mil dimoun. Lannen 2022 casualty ki'n sipoze pou emergency only in war 41mil dimoun. E apre sa byensir letan ou bezwen atann en pe letan, dimoun i konplent e bann ki annan pli gro lavwa zot al lo Facebook.
Drog pou osi afekte nou mendev. Mon pe dir Seselwa annou reste en pei endepandan. Annou reste en pei kot nou ki kontrol nou Lendistri Touris. Nou ki - me kimannyer i pe ale avek sa drog, nou pou vwar plis etranze pe vini.
Letan mon balans lakantite nou bann zenn ki pe al dan bann landrwa kot nou pou bezwen plis travayer, parey dan domenn medikal nou pa pe war sa kantite.
Alors letan mon pe regard sa kiltir lensilt, sa kiltir dekourazman lo kote leadership, apre sa letan mon war lo sa kote nou pep li menm kimannyer drog ki pe kontrol tou, mon annan konsern pou lavenir nou pei.
Letan - dan detrwa zour la mon pou ganny 62an - letan mon pe regarde mon annan bokou konsern. E Mr Speaker mon ava dir, mon konsern i osi vin koumsa, letan politisyen ki anvi diriz sa pei i al Corgat Estate e i dir avek bann ki a pe ravaz sa kominote, bann ki a pe vann zot pwazon,’’ pa trakase nou konnen ki poudir zot pe ganny hard time, nou, nou pe sanz keksoz’’. Ki mesaz ki ou pe anvoye? Ki mesaz ki zot pe anvoye?
Mr Speaker vreman si nou al dan sa direksyon, nou pou bite. E mwan mon anvi ki nou al dan en lot direksyon. Alor Mr Speaker letan mon pe al terminen, mon anvi dir avek Lepep Seselwa, pep Seselwa nou pei i dan nou lanmen!
I annan bokou dimoun ki pe kontinyen fer sakrifis. E la mona anvi zis dir avek Lepep Seselwa ki mon ladmirasyon i al toultan pou mon Cabinet of Ministers. Mon admir zot en kantite e mon anvi dir Lepep Seselwa ki letan zot debout anler zot kriye ki poudir bann Minis i ganny en ta soz isi laba - mon anvi dir avek zot ki tou bann Minis ki dan sa Gouvernman, ti ava kapab pe fer en lot travay e i annan serten parmi zot ti pou ganny 4, 5, 6 fwa lapey Minis!
Pa pozisyon Minis ki pe donn zot sa lapey R40mil e ki konmsi zot bann dimoun pli ris. Mwan Mr Speaker mon ti kapab - mon'n ariv 62 - mon ti'n kapab pran mon retret asize trankilman. E mon lavi ti pou bokou pli konfortab, ou osi tou Mr Speaker ti'n kapab asize trankil, fer lezot keksoz, zwe dan ou zarden e enjoy ou lavi.
Mwan mon ti a kapab avek mon pti zanfan, zwe, riye, fer gou, al lo lans - mon pa ni rapel ki dernyen fwa mon ti al lo lans - me Seselwa annou pran nou pei serye.
Annou pran son devlopman serye. Annou regard byen dan ki direksyon ki nou pe ale. Annou les lalimyer diriz nou. Annou pa zis les mansonz politik anmenn nou dan tou direksyon.
Annou mentenir nou demokrasi. Annou kontinnyen viv koman frer ek ser Seselwa. E annou dan sa sezon Karenm e byento dan sezon Ramadan ki komanse e bann e osi bann Bahai dan zot moman Sakre, annou nou tou ansanm fer refleksyon lo kimannyer nou pou kontan nou pei plis e kimannyer nou pou fer nou pei mont pli o posib.
Travay dir, valer moral annou bouz devan koman en sel pep, koman en sel rainbow nation.
Ki Bondye i kontinnyen beni nou pei! E mwan ansanm avek tou mon bann koleg nou pa pou zanmen les Sesel tonbe!
Mersi bokou.
