25 November 2025 | Defence.
Sef Lafors Defans Sesel,
Komisyoner Lapolis,
Direkter Servis Nasyonal pou Lentelizans,
Chairperson Komite Defans ek Sekirite dan Lasanble Nasyonal,
Manm Konsey Lafors Defans,
Zofisye Sinyor,
Zofisye e tou bann ran militer Lafors Defans,
Staff Sivilyen,
Reprezantan Lasosyasyon Ex-serviceman,
Envite Distenge,
Manm Media,
Myse Madanm Manmzel,
44an pase, Lafors Defans Sesel, ti montre lemonn ki i ti pare pou defann nou pei kont en latak direk lo son soverennte e stabilite.
44an pase, lepep Seselwa ti temway kouraz nou bann manm lafors, zofisye lapolis e bann Seselwa patriotik ki ti reponn avek kouraz pou repous sa lagrasyon merserner.
Ozordi, le 25 Novanm, 44an ezakteman apre sa latak , nou salye tou bann ki’n asire ki Sesel i reste touzour lib e an sekirite.
Koman Komandan-An-Sef nou Lafors Defans, mon onor e dir en remersiman profon o non lepep Seselwa, pou bann ki ti defann nou patri.
Nou rann en omaz spesyal, Dezyenm Lietnan David Antat, ki ti fer sa pli gran sakrifis, pour defann Larepiblik.
Son kouraz, ansanm avek determinasyon tou bann ki ti lager, i kontinyen enspir bann zenerasyon Seselwa.
Pour nou bann veteran ki’n viv sa bann moman, e pour tou bann ki’n met sa liniform ziska ozordi, nou dir zot mersi.
Sesel pa pou zanmen obliy zot.
Ozordi, Sesel i onor zot.
Lafors Defans Sesel i reprezant lafyerte e determinasyon nou pti pei.
Me nou osi rekonet sakrifis ki zot fer e mon felisit zot pour lwayote e devouman ki zot anmenn dan zot profesyon toulezour.
Depi son formasyon en 1977, lafors in agrandi, devlope e transformen pou vin en lenstitisyon modern e profesyonel.
Ozordi, Lafors Defans Sesel i gany rekonnet dan Losean Endyen e pli lwen ankor, pou son profesyonalism, son disiplin ek son ekselans operasyonal.
Ozordi, nou Coast Guard i asir lentegrite nou lespas maritim dan enn bann pli gran EEZ dan nou rezyon.
Nou Air Force i kontinyen demontre son lenportans avek bann misyon konpleks- lizour koman aswar- avek bann vol sirveyans, evakiasyon medikal ek bann loperasyon repons irzans.
Nou Unit Loperasyon Spesyal, in evolye pou vin en lebra endispensab dan nou sistenm defans.
E atraver Lafors, depi bann enzenyer, lozistisyen, tim medikal, administrater e spesyalis sivilyen, tou endividi e seksyon i zwe en rol stratezik e fondamantal pou gard sa lentitisyon for, rezilyan e touzour vizilan.
Mon fyer pou not progre dan Lafors dan sa bann denyen lannen.
Bann loperasyon kont piratri ek kont trafiker drog in afeblir bann rezo kriminel e ede protez nou sosyete.
Bann misyon sekirite maritim in ranforsi nou repitasyon koman enn parmi bann lafors pli serye dan la rezyon.
Bann legzersis konzwent ek korperasyon enternasyonal avek bann pei zanmi in ranforsi nou kapasite stratezik.
E bann misyon imaniter, bann loperasyon ‘search and rescue’ ek repons irzans kont dezas, i demontre konpasyon ek devouman nou bann zonm ek fanm dan lafors.
Ozordi nou mazinn bann kin kit nou, bann kin pran zot retret- e nou rekonet zot sakrifis.
Les mon reasir tou manm lafors, ki lepep Seselwa i valoriz, e rekonet zot travay dir e nou reste rekonesan pou zot zefor e kouraz.
Koman Komandan-An-Sef, mon demann sak manm e zofisye pour pa zanmen bliye ki i zot responsabilite, anba konstitisyon, pou defann nou soverennte.
Sa i en loner e privilez ki lepep Seselwa in konfye sak zonm e fanm ki zwenn lafors.
I pa en rol ki nou devret pran a la lezer.
Ser Manm Lafors,
44 an pase, menas ti en group mersener.
Ozordi, menas i pli konpleks e i lo lanmer avek bokou risk klimatik-nou vwar piratri, nou vwar bann ki vin lapes ilegalman e trafiker ki kontinyen servi nou delo pour transport drog ki pe anpwazonn nou lazenes.
Me se gras a nou lafors defans ki nou kontinyen viv dan lape, dan stabilite akoz kan bokou nou pe dormi, nou bann manm lafors pa zanmen aret travay.
Se pour sa rezon, ki nou bezwen siport devlopman nou lafors defans.
Dan en lemonn kot menas i evolye e kot kriminel i vin pli ‘smart’, i enportan ki nou ekip nou lafors avek resours e bann kapasite modern.
Nou bezwen revwar nou bann stratezi militer e entegre teknolozi dan tou nivo nou bann loperasyon.
Bon lenformasyon e lentelizans i bezwen form labaz tou bann desizyon.
Se sa vizyon ki mon le partaz avek tou manm lafors Ozordi-En lafors Defans ki reste lafyerte nou nasyon.
En lafors ki kontinyen develope, ki vin pli solid, pli profesyonel e ki kapab adapte pou ‘deal’ avek nenport ki defi.
Mon le reassir zot , ki zot annan mon sipor total pou ki lafors i mont lo en pli o nivo e standar.
Lape, sekirite ek stabilite i fondasyon devlopman en pei e se nou lafors defans ki protez e defann sa bann pilye fondasyon nou sosyete.
Mon swe i ki zot kontinyen travay avek lwayote e ki zot servi nou pei avek kouraz e entegrite.
Mon swet zot tou en bon lazournen e ankor mersi pou zot servis nob ek devouman anver nou Larepiblik.
Ki Bonye i beni nou Lafors Defans, nou bann veteran ek zot fanmiy.
E ki Bondye i beni La Repiblik Sesel
Mersi
